ხორავას ქუჩის ტრაგედიიდან ერთი წლის შემდეგ შინაგან საქმეთა მინისტრი გიორგი გახარია ისევ ამბობს, რომ უწყება ყველაფერს გააკეთებს საქმის დასახურად.

"ჩვენ გავაკეთებთ მაქსიმუმს იმისთვის, რომ სასამართლო პროცესი დასრულდეს და ის შედეგი იყოს, რომელსაც პირველ რიგში ოჯახი და მთელი საზოგადოება ელოდება - ობიექტური და იმსახურებდეს ნდობის მაღალ ხარისხს. ამისთვის პოლიცია აკეთებს ყველაფერს და პოლიცია გააკეთებს ყველაფერს. თუმცა, მესმის, რომ ეს არის ფუჭი სიტყვები მშობლებისთვის, მამისთვის და კიდევ ერთხელ მინდა უდიდესი მწუხარება გამოვთქვა ამ ტრაგედიის გამო", — განაცხადა გიორგი გახარიამ.

ხორავას ქუჩის საქმის გამოძიებიდან ერთი წელი გავიდა. ამ დრომდე უცნობია ზაზა სარალიძისთვის, ვინ მოკლა მისი შვილი. ის განაჩენის გამოცხადების დღიდან აქციებს მართავს და დათო სარალიძის მკვლელების დასჯას ითხოვს. ხორავას ქუჩის ტრაგედიიდან ერთი წლის შემდეგ რუსთაველის გამზირზე საპროტესტო აქცია-მსვლელობა გაიმართა. მსვლელობა რუსთაველის გამზირიდან დაიწყო და ხორავას ქუჩაზე მკვლელობის ადგილას დასრულდა. ზაზა სარალიძემ მხარდამჭერებთან ერთად დანგრეული ფარდულის ტერიტორიაზე სანთლები დაანთო და კიდევ ერთხელ, თქვა, რომ ყველაფერს გააკეთებს დამნაშავეების დასასჯელად.

ზაზა სარალიძე მისი შვილის მკვლელის დასჯას ამ დრომდე უშედეგოდ ითხოვს. თითქმის 3 თვეა, ის, პანკისში მოკლული თემირლან მაჩალიკაშვილის მამასთან ერთდ, პარლამენტის შენობის წინ პერმანენტულ აქციას მართავს.

ხორავას ქუჩაზე მოზარდების დაპირისპირების დროს ლევან დადუნაშვილი ადგილზე დაიღუპა, დათუნა სარალიძე კი მრავლობითი ჭრილობებით საავადმყოფოში 2 დეკემბერს გარდაიცვალა.

გაიგე მეტი: მკვლელობა ხორავას ქუჩაზე