ქუთაისში 83-ე საარჩევნო უბანზე ბიულეტენი, სადაც სალომე ზურაბიშვილი გადახაზული იყო, ხოლო გრიგოლ ვაშაძე შემოხაზული, გააბათილეს. ფაქტის ამსახველი ვიდეო ფეისბუქზე ზვიად კუპრავამ გაავრცელა.

საარჩევნო კოდექსის მიხედვით, კომისიას ბიულეტენის გაუქმენის გადაწყვეტილება არ უნდა მიეღო, რადგან კოდექსი არ კრძალავს ერთი კანდიდატის გადახაზვას და მეორის შემოხაზვას.

საარჩევნო ბიულეტენი მხოლოდ იმ შემთხვევაში მიიჩნევა ბათილად, თუ:

  • საარჩევნო ბიულეტენი დამოწმებული არ არის ამომრჩეველთა რეგისტრატორის ხელმოწერითა და სპეციალური ბეჭდით;
  • შეუძლებელია იმის დადგენა, რომელ საარჩევნო სუბიექტს მისცა ხმა ამომრჩეველმა;
  • სპეციალურ კონვერტში აღმოჩნდა დადგენილ რაოდენობაზე მეტი საარჩევნო ბიულეტენი;
  • სპეციალური კონვერტი არ არის დადგენილი ნიმუშისა;
  • საარჩევნო ბიულეტენი საარჩევნო ყუთში აღმოჩნდა სპეციალური კონვერტის გარეშე;
  • საარჩევნო ბიულეტენი განკუთვნილი იყო სხვა საარჩევნო უბნისათვის.

ცენტრალურმა საარჩევნო კომისიამ ხმების 90%-ზე მეტი დაითვალა. ამ მონაცემებით სალომე ზურაბიშვილმა მიიღო ხმების 59,56%, ხოლო გრიგოლ ვაშაძემ — 40,44%.

ორი ეგზიტპოლის შედეგები

რუსთავი 2-ისა და იმედის ეგზიტპოლებით საპრეზიდენტო არჩევნებს მმართველი გუნდის მიერ მხარდაჭერილი კანდიდატი სალომე ზურაბიშვილი იგებს. იმედის შედეგებით, რომელიც კომპანია გალაპ ინტერნეიშენალმა ჩაატარა, საპრეზიდენტო არჩევნებში მმართველი გუნდის მიერ მხარდაჭერილ კანდიდატს, სალომე ზურაბიშვილს ხმების 58 პროცენტი აქვს. გაერთიანებული ოპოზიციის პრეზიდენტობის კანდიდატმა, გრიგოლ ვაშაძემ კი ხმების 42 პროცენტი მიიღო.

რუსთავი 2-ის ეგზიტპოლის შედეგების მიხედვით, საპრეზიდენტო არჩევნებში მმართველი გუნდის მიერ მხარდაჭერილი კანდიდატი, სალომე ზურაბიშვილი 55 პროცენტით იგებს. გაერთიანებული ოპოზიციის პრეზიდენტობის კანდიდატმა კი ხმების 45 პროცენტი მიიღო. რუსთავი 2-მა ედისონ რისერჩის ეგზიტპოლის 17:00 საათის მონაცემები გამოაქვეყნა.

ამავე თემაზე: