ედისონ რისერჩის აღმასრულებელმა დირექტორმა, რობ ფარბმანმა, რუსთავი 2-ის პირდაპირ ეთერში განაცხადა, რომ საპრეზიდენტო არჩევნების მეორე ტურის გამარჯვებული სალომე ზურაბიშვილი გახდა და ეს შედეგი არ შეიცვლება, იმის მიუხედავად, რომ ორგანიზაციის მიერ ჩატარებული ეგზიტპოლის შედეგები ჯერ სრულად არაა დათვლილი:

"საუბარია 10%-იან სხვაობაზე. 55% აქვს სალომე ზურაბიშვილს და 45% — გრიგოლ ვაშაძეს. ეს არის წინასწარი შედეგები, შესაძლოა ისინი შეიცვალოს, მაგრამ ჩვენი მონაცემებით, გამარჯვებული ამ არჩევნებში არ შეიცვლება და ეს სალომე ზურაბიშვილია".

ფარბმანის სიტყვებით, ახლა ითვლიან ბოლო სამი საათის განმავლობაში მიღებულ მონაცემებს, რომლის შედეგებსაც მოგვიანებით გაავრცელებენ.

რუსთავი 2-ისთვის კვლევა საპრეზიდენტო არჩევნების პირველი ტურისა და გასული წლების მსგავსად კომპანია ედისონ რისერჩმა ჩაატარა. შედეგებში ცდომილების ფარგლები +/-3%-ია.

ეს ედისონ რისერჩის რიგით მეხუთე ეგზიტპოლია საქართველოში. ფარბმანის სიტყვებით, იმ მოქალაქეებიდან, რომლებსაც გამოკითხვისთვის მიმართეს, 50% დათანხმდა ინტერვიუს. გამოკითხვა 115 უბანზე ჩატარდა.

საარჩევნო ოლქები 20:00-ზე დაიხურა და ხმების დათვლის პროცესი დაიწყო. პირველად შედეგებს ცენტრალური საარჩევნო კომისია, სავარაუდოდ, ღამის 01:00-ზე გამოაცხადებს.

გაიგეთ მეტი: