საქართველოს პრეზიდენტობის ყოფილი კანდიდატის, დავით ბაქრაძის თქმით, ამ არჩევნებით საზოგადოება უნდა დარწმუნდეს, რომ საქართველო დემოკრატიული ქვეყანაა, სადაც თანამდებობის პირები არჩევნების გზით იცვლებიან.

მისი თქმით, ხმა მისცა, პირველ რიგში, ცვლილებებს, კეთილდღეობას და უკეთეს მომავალს.

"არჩევნების პირველ ტურში ჩვენმა საზოგადოებამ აჩვენა, რომ ხალხსა და ქვეყანას სჭირდება ცვლილებები. პირველი ტურის დასკვნა არის ის, რომ ამომრჩეველი მეორე ტურისგან ელოდება წინსვლას, კეთილდღეობას და უკეთეს მომავალს. თუ ამომრჩეველი მოვა გაყალბება ვერ მოხდება, ეს გახლავთ გაყალბების საუკეთესო წამალი", — განაცხადა დავით ბაქრაძემ.

კითხვაზე, იქნება თუ არა გადამწყვეტი ევროპული საქართველოს მხარდაჭერა, მეორე ტურში გასული ოპოზიციონერი კანდიდატისთვის, ბაქრაძე პასუხობს, რომ მისი პარტიის მხარდამჭერების მონაწილეობა იქნება მნიშვნელოვანი, თუმცა გადამწყვეტი მაინც ხალხის ნებაა.

"ქართველმა ხალხმა კიდევ ერთხელ უნდა აჩვენოს პოლიტიკური კლასი და კულტურა, რომ საქართველო არის დემოკრატია, სადაც ხელისუფლებები არჩევნების გზით იცვლებიან", — განაცხადა ბაქრაძემ.

დღეს, 28 ნოემბერს საქართველოში საპრეზიდენტო არჩევნების მეორე ტური იმართება. საქართველოს მასშტაბით დილის რვა საათზე საარჩევნო უბნები გაიხსნა და ხმის მიცემის პროცესი დაიწყო.

მეორე ტურში მონაწილეობას გაერთიანებული ოპოზიციის კანდიდატი გრიგოლ ვაშაძე და მმართველი პარტიის მხარდაჭერილი კანდიდატი სალომე ზურაბიშვილი იღებენ.