ყოფილი პრემიერ მინისტრი ირაკლი ღარიბაშვილი არჩევნებამდე 2 დღით ადრე მოუწოდებს საზოგადოებას ერთად უთხრან უარი მიხეილ სააკაშვილსა და "მის ანტიეროვნულ პოლიტიკურ ძალას". ღარიბაშვილი ნაციონალური მოძრაობის ცხრაწლიან რეჟიმსა და მთავრობის ცვლილებაში ბიძინა ივანიშვილის როლზე საუბრობს.

ექსპრემიერი მეორეა პარტიის თავმჯდომარის, ბიძინა ივანიშვილის მიერ ნახსენები "ძველი გვარდიიდან", ვინც წინასაარჩევნო მოწოდება გაავრცელა. პირველი ასევე ექსპრემიერი, გიორგი კვირიკაშვილი იყო.

არჩევნების პირველი ტურის შემდეგ ბიძინა ივანიშვილის ვიდეომიმართვა გავრცელდა, რომლითაც მან "ძველ გვარდიას", გაბრაზებულ თანამებრძოლებს დახმარება თხოვა და დაპირდა, რომ ღვაწლი დაუფასებელი არ დარჩებოდა.

"ახლა მთავარია, ხელისუფლებასა და ცალკეულ ჩინოვნიკებზე გაბრაზებულებმა, ხელისუფლების დასჯის სურვილით, საკუთარი მომავალი და საკუთარი ქვეყანა არ დავსაჯოთ და არ გადავყაროთ წყალში ყველაფერი, რაშიც 2012-ში სიცოცხლე ჩავდეთ", — აღნიშნა ივანიშვილმა ვიდეომიმართვაში.

ირაკლი ღარიბაშვილმა საქართველოს პრემიერ-მინისტრის პოსტი 2013 წლის წლის 20 ნოემბერს დაიკავა და 2015 წლის 24 დეკემბერს დატოვა.