შინაგან საქმეთა სამინისტროში აცხადებენ, რომ რუსთავი 2-ის გავრცელებული ინფორმაცია, თითქოს კრიმინალური ავტორიტეტი, ლავას ოღლი, გაათავისუფლეს სიცრუეა. უწყების განცხადებით, ლავას ოღლი, იგივე მინდია გორაძე თურქეთში საექსტრადიციო პატიმრობაში რჩება.

"ტელეკომპანიისა და ლავას ოღლის უფლებადამცველის მიერ გავრცელებული ინფორმაცია არის სიცრუე, სახელმწიფო ინსტიტუტების დისკრედიტაცია და მიზანმიმართულად საზოგადოების
შეცდომაში შეყვანის მცდელობა", — განაცხადა ბრიფინგზე ცენტრალური კრიმინალური პოლიციის დეპარტამენტის დირექტორმა ვლადიმერ ბორცვაძემ.

რუსთავი 2-ის ეთერში გასული სიუჟეტში ამბობდნენ, რომ აჭარაში წაგებული არჩევნების შემდეგ ქართული ოცნება ბრძოლას წესების გარეშე განაგრძობს. მათი თქმით, ამისთვის რეგიონში ე.წ კანონიერი ქურდი, მინდია გორაძე მიიწვიეს. ლავას ოღლის გათავისუფლების შესახებ ინფორმაცია რუსთავი 2-ს მისმა ადვოკატმა მიაწოდა.

ლავას ოღლის ბრალი ედება სისხლის სამართლის კოდექსის 223-ე პრიმა მუხლის 2 ნაწილით, რაც გულისხმობს კანონიერ ქურდობას. ქუთაისის სასამართლომ მას დაუსწრებლად მიუსაჯა თავისუფლების აღკვეთა 12 წლის ვადით. თურქმა სამართალდამცველებმა ლავას ოღლი მიმდინარე წლის ოქტომბერში, ტრაბზონში დააკავეს.