მმართველი გუნდის მიერ მხარდაჭერილი საპრეზიდენტო კანდიდატი, სალომე ზურაბიშვილი მის მიმართ მუქარის საქმეზე არასამთავრობო ორგანიზაციებს შეხვდა. შეხვედრის შემდეგ ზურაბაშვილმა განაცხადა, რომ არასამთავრობოებმა რეაგირება მოახდინეს როგორც ამ საქმეზე, ისე მისი გამოსვლების შემდეგ სიძულვილის ენაზე.

"ასევე გამოთქმული იყო სურვილი, რომ მჭიდრო ურთიერთობა გვქონდეს არასამთავრობოებთან, ეს არის ასევე ჩვენი სურვილიც", — განაცხადა ზურაბიშვილმა.

ზურაბიშვილი ამბობს, რომ ის მზად არის არასამთავრობო ორგანიზაციებს გადასცეს ყველა მტკიცებულება, რაც მას გააჩნია.

საერთაშორისო გამჭირვალობა — საქართველოს აღმასრულებელი დირექტორი, ეკა გიგაური ამბობს, რომ ზურაბიშვილზე ყველა თავდასხმა, როცა მას არ აძლევდნენ კამპანიის საშუალებას, აღნიშნულია მათ ანგარიშებში. გიგაური ასევე ამბობს, რომ სანამ საპრეზიდენტო კანდიდატს პრეტენზიები ექნება, იქამდე მათ ნამუშევრებს უნდა გაეცნოს.

"რაც შეეხება ამ ფაქტს, რა თქმა უნდა, ეს არის დასაგმობი. მნიშვნელოვანია, რომ მან მიმართა სამართალდამცავ ორგანოებს და დაიწყეს გამოძიება და უახლოეს ვადებში მათ უნდა დაადგინონ ვინ არიან ის ადამიანები, რომლებიც მას ემუქრებოდნენ და მის ოჯახის წევრებს", — ამბობს გიგაური.

სალომე ზურაბიშვილმა არასამთავრობო ორგანიზაციებთან შეხვედრა მას შემდეგ გადაწყვიტა, რაც მან საგანგებო ბრიფინგზე განაცხადა, რომ მას და მის შვილებს მოკვლით ემუქრებოდნენ.

ზურაბიშვილისა და მისი ოჯახის წევრების მიმართ მუქარის საქმეზე შინაგან საქმეთა სამინისტრომ გამოძიება საქართველოს სისხლის სამართლის კოდექსის 284-ე მუხლის პირველი ნაწილითა და 151-ე მუხლის პირველი ნაწილით, კომპიუტერულ სისტემაში უნებართვო შეღწევასა და მუქარის მუხლებით დაიწყო.