არჩევნების მეორე ტურის წინ მმართველი პარტიის დამფუძნებელი, ბიძინა ივანიშვილი ვიდეომიმართვას ავრცელებს. ივანიშვილი აღიარებს პარტიის დაშვებულ შეცდომებს და მოქალაქეებს მათ მიღწევებზე ესაუბრება.

"უამრავი რისკის მიუხედავად, დამოუკიდებლობის მოპოვების შემდეგ საქართველოს არასდროს ჰქონია ასეთი სტაბილური განვითარების წლები. მიუხედავად ამ წარმატებებისა, ქვეყანაში გამოწვევად რჩება არსებული სიდუხჭირე", — აღნიშნა ივანიშვილმა.

პარტიის ლიდერი ამბობს, რომ შეცდომებს სწორი დანახვა და კრიტიკა უნდა. მისი თქმით, ოპონენტები ამას არ აკეთებენ და "სიცრუის მანქანით ცდილობენ ყველაფრის გადახაზვას".

ქართული ოცნების "ამომრჩეველთან შერიგება"

არჩევნების შედეგების გამოცხადების შემდეგ პრემიერ მინისტრმა მამუკა ბახტაძემ განაცხადა, რომ ხელისუფლებამ ქართული საზოგადოებისგან მიიღო მკაფიო გზავნილი მათ დაშვებულ შეცდომებზე. ამიტომ, მეორე ტურის წინ მმართველმა პარტიამ "ამომრჩეველთან შერიგება" გადაწყვიტა.

პარტიის ოფისში ივანიშვილთან ერთად შეკრებილებმა ამისთვის სხვადასხვა გზები განიხილეს. მაგალითად, დეპუტატმა კარლო კოპალიანმა განაცხადა, რომ თუ "ხალხს მოეფერებიან" და მათი პრობლემებით დაინტერესდებიან, მეორე ტურში აუცილებლად გაიმარჯვებენ.

პრემიერმა კი მთავრობის სხდომაზე განაცხადა, რომ სოციალურად დაუცველ ბავშვებს დახმარებას 10 ლარიდან 50 ლარამდე გაუზრდიან.

ხელისუფლებამ გაითვალისწინა საქართველოს საპატრიარქოს ინტერესებიც და პატრიარქთან შეთანხმებით, მეორე ტურის წინ მარიხუანის კულტივაციის კანონპროექტი გაიწვია. კიდე ერთი ინიციატივა, რომელიც მეორე ტურის წინ მმართველმა გუნდა დააანონსა საკონსტიტუციო სასამართლოს გადაწყვეტილებების შეზღუდვაა.