შინაგან საქმეთა მინისტრის მოადგილემ ნათია მეზვრიშვილმა, ხორავას ქუჩაზე მოკლული მოზარდის მამის, ზაზა სარალიძის დაკავებასთან დაკავშირებით თქვა, რომ პოლიცია მის მდგომარეობას ითვალისწინებდა, დღეს კი იძულებული გახდა დაეკავებინა:

"ბოლო თვეების განმავლობაში ჩვენ ვნახეთ არაერთი შემთხვევა, როდესაც ბატონი ზაზა სარალიძე პოლიციის მიმართ სიტყვიერი შეურაცხყოფის ხერხებს მიმართავდა. თუმცა, გვესმოდა ადამიანურად, მისი მდგომარეობა და ამ მდგომარეობის გათვალისწინებით, პოლიცია მთელი ამ თვეების განმავლობაში უბრალოდ იდგა და ყველაფერზე თვალს ხუჭავდა. ვგულისხმობ სიტყვიერი შეურაცხყოფის ფაქტებს".

ზაზა სარალიძე სისხლის სამართლის კოდექსის 353-ე პრიმა მუხლით არის დაკავებული, რაც პოლიციელზე თავდასხმას გულისხმობს.

შინაგან საქმეთა სამინისტროს ინფორმაციით, ზაზა სარალიძე და მასთან ერთად კიდევ ორი პირი პოლიციელზე თავდასხმის ბრალდებით დააკავეს.

ზაზა სარალიძემ სამართალდამცავების მიმართ აგრესია მას შემდეგ გამოხატა, რაც მას თბილისში, პარლამენტის შენობასთან კარვის გაშლის უფლება არ მისცეს. ეს პირველი შემთხვევა არაა, როცა მას ეს უფლება შეუზღუდეს.

სარალიძის დაკავების შემდეგ 26 ოქტომბერს, 7 საათზე პარლამენტის წინ აქციაც დაიგეგმა.

"ნუ დავტოვებთ სარალიძეს მარტოს სასტიკი და ყრუ სისტემის წინაშე! ნუ იქნება სულ ერთი", — წერია ფეისბუქზე აქციის ღონისძიებაზე, რომლის ორგანიზატორიც გიგა მაქარაშვილია.