9 ოქტომბერს ევროსაბჭოში განიხილავდნენ რეზოლუციას რუსეთისთვის სანქციების მოხსნის შესახებ, რასაც უკრაინული დელეგაციის პროტესტი მოყვა. საპროტესტო პერფონმანსის გასავრცელებლად კი დელეგაციამ საუკეთესო გზა შეარჩია — რუსული სახელისუფლებო მედია.

უკრაინის უმაღლესი რადის დეპუტატმა, ალექსეი გონჩარენკომ Россия 1-ის ჟურნალისტთან ინტერვიუს ჩაწერის დროს დამცავი ხელთათმანები გაიკეთა. დეპუტატმა განაცხადა, რომ ეშინოდა რუსეთის პროსახელისუფლებო მედიის ჟურნალისტთან მიახლოების. ეს კი იმით ახსნა, რომ რუსეთი აქტიურად იყენებს ქიმიურ იარაღს კონკურენტების გასანეიტრალებლად.

"რუსეთი წამლავს ხალხს მთელს მსოფლიოში, ქუჩაშიც კი. შესაძლოა აქაც გამოეგზავნათ თავისი წარმომადგენლები, მათ შორის თქვენც, ამიტომ მიკეთია ქიმიური ხელთათმანები. რა თქმა უნდა, საჭირო იქნება რადიოაქტიური კოსტიუმიც, მაგრამ მასაც აუცილებლად მოვამზადებ, რადგან პოლონიუმის გამოყენებაც გიყვართ. თქვენ სხვადასხვა ხერხებით კლავთ პოლონიუმი, ნოვიჩოკი და სხვა ბევრი გზა გაქვთ", — მიმართა გონჩარენკომ ჟურნალისტს და დაამატა, რომ რუსეთი ევროსაბჭოში გამარჯვებული ვერ დაბრუნდებოდა და სანქციებს არ გააუქმებდნენ.

თუმცა, ამბავი ამით არ დასრულებულა და პროტესტი რუსული მედიის პირდაპირ ეთერშიც მოხვდა მაშინ, როცა უკრაინელმა დეპუტატებმა რუსი ჟურნალისტის ჩართვა უკრაინის ჰიმნით ჩაშალეს. რუსი ჟურნალისტი ეთერში მაყურებელს ბოდიშს უხდიდა დეპუტატების ქცევისთვის და მომხდარს თეატრალურ წარმოდგენად აფასებდა.

"აი ეს არის თანამედროვე უკრაინის სახე, თუმცა ჩვენ უნდა გვესმოდეს, რომ ეს არის თანამედროვე პოლიტიკა", — განაცხადა რუსმა ჟურნალისტმა, თუმცა რეაგირება არც ამ განცხადებას მოჰყოლია. პასუხად კი დეპუტატებთან ერთად ჰიმნი უკრაინელმა ჟურნალისტებმაც იმღერეს.

"დიდება უკრაინას, დიდება გმირებს", — რუსი ჟურნალისტის პირდაპირ ეთერი უკრაინულმა დელეგაციამ ამ სიტყვებით დაასრულა.

რაც შეეხება რეზოლუციას, რომელიც ევროსაბჭოში რუსეთისთვის სანქციების მოხსნის შესაძლებლობას იძლეოდა, ავტორმა უკან გაიწვია. ეს ნიშნავს, რომ მინიმუმ ერთი წლის განმავლობაში რუსეთს არ აღუდგება ხმის უფლება ევროსაბჭოში. მოსკოვისთვის სანქციების მოხსნის კენჭისყრის შედეგები ასე გადანაწილდა: 99 მომხრე, 79 - წინააღმდეგი, 16-მა თავი შეიკავა.

რუსეთმა კი განაცხადა, რომ ევროსაბჭოს გადაწყვეტილებით უკმაყოფილოა. რუსეთის დელეგაციას ევროსაბჭოში ხმის მიცემის უფლება 2014 წელს, ყირიმის ანექსიის შედეგად შეუჩერდა. ამის გამო რუსეთმა ევროსაბჭოს დაფინანსებასა და საპარლამენტო ასამბლეის მუშაობაში მონაწილეობაზე უარი თქვა.