ფეისბუქის მიერ გავრცელებული ინფორმაციით, განხორციელებული კიბერთავდასხმის შედეგად ჰაკერებმა წვდომა 50 მილიონი მომხმარებლის ანგარიშზე მოიპოვეს.

კომპანია აცხადებს, რომ ამის შესახებ მათ სამშაბათს შეიტყვეს.

"თავდამსხმელებმა შეტევის განსახორციელებლად ფუნქცია "View As" გამოიყენეს. ამ ფუნქციის საშუალებით თქვენ შეგიძლიათ შეამოწმოთ თუ როგორ გამოიყურება თქვენი პროფილი სხვა მომხმარებლების თვალით", — ნათქვამია ფეისბუქის ბლოგ პოსტში.

გამოძიება ჯერ კიდევ ადრეულ სტადიაშია და ცნობები იმის შესახებ ვინ შეიძლება იდგეს თავდასხმის უკან, ან მოხდა თუ არა რაიმე ინფორმაციის გაჟონვა, ნაადრევია.

ამის გამო ფეისბუქმა დაახლოებით 90 მილიონი ადამიანის ანგარიშის პროგრამული გასაღები გაანულა, რამაც მომხმარებლები საკუთარი ანგარიშიდან გამოაგდო, ხოლო დამატებითი უსაფრთხოების მიზნით ფეისბუქმა ფუნქცია "View As" დროებით გათიშა.

კომპანია აცხადებს, რომ ასეთი თავდასხმა შესაძლებელი 2017 წელს განახლებულმა ერთ-ერთმა პროგრამულმა კოდმა გახადა, რომელიც ვიდეოების ატვირთვის პროცესთან არის კავშირში. კიბერთავდასხმას მარკ ცუკერბერგი საკუთარ პოსტშიც გამოეხმაურა.

ოფიციალურ განცხადებაში ნათქვამია, რომ პაროლისა და სხვა მონაცემების შეცვლის საჭიროება არ არსებობს.