"კანონპროექტი, რომელიც არის წარმოდგენილი, არავითარ სივრცეს არ ტოვებს სპეკულაციებისთვის", - ამის შესახებ საქართველოს პარლამენტის თავმჯდომარემ მარიხუანას მოხმარებასთან დაკავშირებით, შინაგან საქმეთა სამინისტროს მიერ მომზადებულ კანონპროექტზე საუბრისას განაცხადა.

ირაკლი კობახიძის თქმით, საკონსტიტუციო სასამართლოს მიერ მიღებული კონკრეტული გადაწყვეტილება ლიბერალიზაციისკენ არის მიმართული და მმართველი გუნდის ამოცანა იყო მარიხუანას მოხმარების მაქსიმალურად მკაცრი რეგლამენტაცია.

"მაქსიმალურად მკაცრ ჩარჩოებში არის მოქცეული მარიხუანას მოხმარება იმ კანონპროექტის თანახმად, რომელიც იქნება წარმოდგენილი საქართველოს პარლამენტის წინაშე უკვე უახლოეს დღეებში ოფიციალურად", - განაცხადა ირაკლი კობახიძემ.

პარლამენტის თავმჯდომარე განმარტავს, რომ კანონპროექტს ორი მიზანი აქვს: საექსპორტო და სამეწარმეო.

"როგორც მოგეხსენებათ, კოსმეტიკური საშუალებების დასამზადებლად გამოიყენება შესაბამისი ზეთი და ამ მიზნით მოხდება, ასე ვთქვათ, ამ მცენარის გამოყენება. საუბარია, კიდევ ერთხელ, იმაზე, რომ კონკრეტული ეკონომიკური, ასე ვთქვათ, საქმიანობისთვის შეიძლება გაიხსნას ეს სფერო, თუმცა, გამორიცხულია ლეგალიზაცია. რეალურად, აქეთკენ მიდიოდა პროცესები საკონსტიტუციო სასამართლოს გადაწყვეტილებიდან გამომდინარე, თუმცა, ჩვენ შევძელით ამ პროცესის ჩარჩოში მოქცევა იმ კანონპროექტით, რომელიც არის წარმოდგენილი",- განაცხადა პარლამენტის თავმჯდომარემ.

მისივე თქმით, აღნიშნულთან დაკავშირებით არის სპეკულაციებიც, თუმცა წარმოდგენილი კანონპროექტი სპეკულაციებისთვის არავითარ სივრცეს არ ტოვებს. მისი განცხადებით, მმართველი გუნდი პროცესების არასწორი მიმართულებით განვითარებას არ დაუშვებს.

"ეს თამამად შეგვიძლია ვუთხრათ ქართულ საზოგადოებას, რომელსაც აქვს, ბუნებრივია, მგრძნობიარე დამოკიდებულება ამ საკითხთან დაკავშირებით და ეს დამოკიდებულება არის, აბსოლუტურად, გასაგები. ჩვენ არ დავუშვებთ არასწორი მიმართულებით ამ პროცესების განვითარებას. ლეგალიზაცია რასაც ჰქვია, ეს არის დაუშვებელი", - განაცხადა საქართველოს პარლამენტის თავმჯდომარემ.