პარტია ქართული ოცნების დეპუტატმა, გია ვოლსკიმ განაცხადა, რომ ხორავას ქუჩაზე მოკლული დავით სარალიძის მამის, ზაზა სარალიძის გლოვა ყველასთვის გასაგებია, თუმცა დაგეგმილ აქციებს პოლიტიკური ელფერი დაკრავს და საქმის განხილვისას სამართლებრივი გზისთვის გაყოლაა საჭირო.

"მე ვფიქრობ, რომ სასამართლო არსებობს, რომელიც საკმაოდ დამოუკიდებელია იმისათვის, რათა გადაწყვეტილებები ამ საკითხთან დაკავშირებით მიიღოს", - განაცხადა ვოლსკიმ ქართული ოცნების პოლიტსაბჭოს სხდომის შემდეგ ჟურნალისტებთან საუბრისას.

თბილისის საქალაქო სასამართლოს გადაწყვეტილებით, ხორავას ქუჩის საქმეზე გამამტყუნებელი განაჩენი ორი პირის მიმართ დადგა. კერძოდ, ერთი პირი ლევან დადუნაშვილის მკვლელობისთვის გაასამართლეს, მეორე კი დავით სარალიძის მკვლელობის მცდელობისთვის. სასამართლოს გადაწყვეტილების მიხედვით, ამ დრომდე სარალიძის მკვლელის ვინაობა დაუდგენელია. სწორედ სასამართლოს გადაწყვეტილების შემდეგ გაიმართა აქციები, რომელზეც ზაზა სარალიძე მისი შვილის მკვლელობაში გარეული პირების დასჯას ითხოვდა.

სარალიძე 10 სექტემბერს საპროტესტო აქციებს აახლებს. მისი თქმით, შერჩევითი სამართალი უნდა დასრულდეს და ყველა ადამიანს მხარდაჭერისკენ მოუწოდებს. სარალიძემ აქცია მას შემდეგ დაგეგმა, რაც პარლამენტის დროებითმა საგამოძიებო კომისიამ მუშაობა დაასრულა.