ხორავას ქუჩაზე მოკლული დავით სარალიძის მამა, ზაზა სარალიძე "სამართლიანობის აღსადგენად" სექტემბრიდან აქციების განახლებას აპირებს.

"ფაქტია, რომ ჩემი შვილის მკვლელები გარეთ არიან და არავინ აპირებს მათ დაკავებას", - განუცხადა მან On.ge-ს.

მან, ასევე, განმარტა, რომ სასამართლოს 9 აგვისტოს გადაწყვეტილება არ უკვირს. თბილისის საქალაქო სასამართლომ ხორავას ქუჩის საქმეზე დანაშაულის შეუტყობინებლობისთვისა და დაფარვისთვის ბრალდებულ სამი პირს აღკვეთის ღონისძიების სახით გირაო შეუფარდა.

"მთავარი მოწმე, მიხეილ კალანდია არ დაკითხულა ამ სასამართლო პროცესზე და გაათავისუფლეს სასამართლო პროცესისგან. ეს მოსამართლის გადაწყვეტილება არამგონია იყო. ეს ვიღაცამ უთხრა, რომ ასეთი გადაწყვეტილება უნდა მიეღო", - განაცხადა სარალიძემ.