მანჩესტერ სიტის მწვრთნელის პეპ გვარდიოლას თქმით, იგი ჩელსის ახალ სპეციალისტ მაურისიო სარისგან ბევრ რამეს ისწავლის.

ჩელსიმ სარი ანტონიო კონტეს შემცვლელად მოიყვანა. მიუხედავად იმისა, რომ კონტემ პირველივე სეზონში მოაგებინა "არისტოკრატებს" პრემიერლიგა, მომდევნო სეზონი მისთვის წარუმატებელი აღმოჩნდა.

"უპირველეს ყოვლისა, აღვნიშნავ, რომ ბედნიერი ვარ პრემიერლიგაში ასეთი დონის მწვრთნელის მოსვლით. მისგან ყოველ კვირას რაღაც ახალს ვისწავლი. [...] ყველანი ბევრ რამეს ვისწავლით ინგლისში მისი იდეების შემოტანით. ჩელსის წინასასეზონო მატჩები ვნახე და მან ეს უკვე მოახერხა. მისი გუნდი უკვე ისე თამაშობს, როგორც მას სურს", - აღნიშნა გვარდიოლამ.

მისივე თქმით, სარის სტილი ინგლისურ ფეხბურთს იდეალურად შეერწყმება.

"რა თქმა უნდა, იმისთვის, რომ მისი იდეები სრულყოფაში მოვიდეს, დროა საჭირო, თუმცა კონტურები უკვე გამოიკვეთა. ჩელსისა და ჩვენი დაპირისპირება ყოველთვის საინტერესო იყო. ასე იქნება სარის დროსაც. [...] ვფიქრობ, სტილი, რომლითაც ის თამაშობს, ინგლისისთვის ზედგამოჭრილი იქნება. მისი აქ ყოფნა ძალიან მიხარია".