ხორავას ქუჩის საქმის საგამოძიებო კომისიის წევრი ევროპული საქართველოდან, ირაკლი აბესაძე იუსტიციის მინისტრის, თეა წულუკიანის გამოკითხვაზე დაბარების მიზეზებზე საუბრობს. აბესაძის თქმით, საქმეში პოლიტიკურმა გავლენებმა და მფარველობამ გამოძიების არასწორად წარმართვა გამოიწვია და ამ პროცესში ერთ-ერთი მთავარი ფიგურანტი თეა წულუკიანია.

აბესაძის თქმითვე, კომისიას აინტერესებდა იუსტიციის მინისტრის შეხედულებები მას შემდეგ, რაც საქმის ახალი გარემოებები გამოიკვეთა.

"მან [წულუკიანმა] პირველ ეტაპზევე, [ირაკლი] შოთაძის გადადგომის პირველივე დღეს თქვა, რომ ეს მიაჩნდა შეცდომად და, რა თქმა უნდა, ჩვენ გვაინტერესებდა ქალბატონი თეას დამოკიდებულება, მას შემდეგ, რაც გამოიკვეთა ამდენი სერიოზული დარღვევა პროკურატურის საქმიანობაში", - განაცხადა აბესაძემ ტელეკომპანია იმედთან საუბრისას.

აბესაძის განცხადებით, წულუკიანი მთავარი პროკურორის დანიშვნაზე პასუხისმგებელი პირია.

"ჩვენ გვაინტერესებდა, როგორ აფასებენ თანამდებობის პირები გამოძიების და პროკურატურის ასეთ მძიმე შეცდომებს და ჩავარდნებს და ეს მნიშვნელოვანი დასკვნების გაკეთების შესაძლებლობას მოგვცემს", - აღნიშნა ევროპული საქართველოს წევრმა.

დღეს, 3 აგვისტოს ხორავას ქუჩის საქმის საგამოძიებო კომისიის სხდომაზე იუსტიციის მინისტრის, თეა წულუკიანის გამოკითხვა ოთხი წუთი გაგრძელდა. წულუკიანს მხოლოდ სამი კითხვა დაუსვა ევროპული საქართველოს წევრმა, ოთო კახიძემ.

იუსტიციის მინისტრმა, თეა წულუკიანმა საგამოძიებო კომისიის დატოვების შემდეგ, ჟურნალისტებთან საუბრისას თქვა, რომ არ ელოდა, თუ მხოლოდ რამდენიმე წუთს გაგრძელდებოდა მისი გამოკითხვა. წულუკიანმა საგამოძიებო კომისიის მნიშვნელობა შეაფასა და ხორავას ქუჩის საქმეში დაზარალებულ მშობლებს უთხრა, რომ პროკურატურა, სასამართლო, გამოძიება ბოლომდე სიმართლის მხარეს იყო.