პროკურატურის განცხადებით, თბილისის საქალაქო სასამართლომ ყოფილი მეუღლის განზრახ მკვლელობისთვის ბრალდებული მარინა დუდაევა დამნაშავედ სცნო საქართველოს სსკ–ის 111, 108-ე მუხლით გათვალისწინებული დანაშაულის ჩადენისათვის და სასჯელის სახედ და ზომად განუსაზღვრა 10 წლით თავისუფლების აღკვეთა.

საგამოძიებო უწყების ცნობით, სასამართლო პროცესზე გამოკვლეული მტკიცებულებებით დადასტურდა, რომ 2007 წლიდან - 2010 წლამდე პერიოდში მარინა დუდაევა არარეგისტრირებულ ქორწინებაში იმყოფებოდა არჩილ ბოღოლაშვილთან:

"მიმდინარე წლის 7 იანვარს, მარინა დუდაევა და არჩილ ბოღოლაშვილი ერთმანეთს თბილისში, ქინძმარაულის ქუჩის მიმდებარედ არსებულ ამ უკანასკნელის საცხოვრებელ სახლში შეხვდნენ, სადაც მიიღეს ალკოჰოლური სასმელი, რის შემდეგაც დაახლოებით 21:00 საათზე სტუმრად მათ ახლობელს ზურაბ ხ-ს ეწვივნენ. სტუმრად ყოფნისას არჩილ ბოღოლაშვილი მარინა დუდაევას მობილურ ტელეფონში არსებულ ინფორმაციას ათვალიერებდა, რამაც ამ უკანასკნელის განაწყენება გამოიწვია. აღნიშნული მიზეზით წარმოქმნილი კონფლიქტის დროს, მარინა დუდაევამ ყოფილ მეუღლეს, შურისძიების მოტივით, განზრახ მოკვლის მიზნით, გულმკერდის არეში დანით ორჯერ მიაყენა ჭრილობა. არჩილ ბოღოლაშვილი მიღებული ჭრილობების შედეგად ადგილზე გარდაიცვალა".

სამართალდამცველებმა მარინა დუდაევა 2016 წლის 8 იანვარს, მომხდარი ფაქტიდან რამდენიმე საათში დააკავეს.