საქართველოს ეკონომიკის მინისტრობის კანდიდატმა, გიორგი ქობულიამ პარლამენტში საკომიტეტო მოსმენის დროს ეკონომიკის სფეროში არსებულ სისტემურ და კერძო გამოწვევებზე ისაუბრა და სამოქმედო ხედვა წარმოადგინა.

სისტემური მიმართულებით ეკონომიკის მინისტრობის კანდიდატმა 4 მთავარი გამოწვევა გამოყო:

საშუალო და მცირე ბიზნესის განვითარების არადამაკმაყოფილებელი ტემპები

მინისტრობის კანდიდატის თქმით, საშუალო და მცირე ბიზნესის განვითარების აჩქარება მოსახლეობის ეკონომიკურ საქმიანობაში ჩართვას უზრუნველყოფს.

ინიციატივები

• საშუალო და მცირე ბიზნესს მიეცეს კრედიტის მარტივად აღების საშუალება;
• ე.წ. კლასტერიზაცია, სხვადასხვა სფეროში მომუშავე მცირე და საშუალო ბიზნესის გაერთიანება.

ინდუსტრიალიზაციის დონის აჩქარება

გიორგი ქობულიას თქმით, საქართველოს აქვს გარე ინვესტიციები, რომელიც ხორციელდება, მაგრამ წარმოებების შექმნა ერთ-ერთი პრიორიტეტია.

ინიციატივა

• საქართველოს ე.წ. შედარებითი უპირატესობების გააზრება. "ჩვენ ყველა სექტორზე ორიენტირებული ვერ ვიქნებით. ჩვენ უნდა ავირჩიოთ სექტორები, რომელშიც ვფიქრობთ, რომ გვაქვს უპირატესობა და მოვიზიდოთ ინვესტიციები", - განაცხადა მინისტრობის კანდიდატმა.
• წარმოების დანერგვა მაღალი ტექნოლოგიების საფუძველზე. "ეს ყველაფერი იქნება ექსპორტზე ორიენტირებული რაც მყარ ვალუტას მოგვიტანს", - ამბობს ქობულია.

რეგიონების განვითარება

მინისტრობის კანდიდატის განცხადებით, აგრარულ სექტორსა და მომიჯნავე სექტორებში ბევრი გამოწვევაა, რომელსაც მოგვარება სჭირდება.

ინიციატივა

• კომპლექსური მუშაობა სოფლის მეურნეობის სამინისტროსთან.
• მსხვილი ინვესტორების მოზიდვა, რომლებიც დასაქმდებიან არა აგრარულ, არამედ აგრარულ სექტორთან მომიჯნავე სექტორებში. მინისტრობის კანდიდატის ხედვით, ეს შექმნის დაკომპლექტებულ ინფრასტრუქტურას სოფლის მეურნეობის შენახვის, გადამუშავებისა და რეალიზაციის მიმართულებით.

ლოჯისტიკური ჰაბი

მინისტრობის კანდიდატის თქმით, ხშირად საუბრობენ, რომ საქართველო ლოჯისტიკური ჰაბია, თუმცა ამ შესაძლებლობის განსავითარებლად და განსახორციელებლად ცოტა კეთდება.

ეკონომიკის მინისტრობის კანდიდატმა კერძო გამოწვევებთან ერთად, ოთხი სისტემური დაბრკოლებაც გამოყო.

ოთხი სისტემური დაბრკოლება

• ადამიანური რესურსი, განათლება, ხალხი და ხალხის უნარ-ჩვევები;
• საერთაშორისო ბაზრებსა და ეკონომიკაში ინტეგრაცია."საქართველო, როგორც ქვეყანა შიდა ბაზრის ხარჯზე ვერ იარსებებს. ჩვენი ყველა ინვესტიცია უმეტესად ექსპორტზე იქნება ორიენტირებული", - განაცხადა მინისტრმა;
• ინფრასტრუქტურის განვითარება;
• საკანონმდებლო ბაზის დახვეწა.

მინისტრობის კანდიდატის განცხადებით, გარდა იმისა, რომ სწორად უნდა დაიგეგმოს სამოქმედო გეგმა, ინიციატივების აღსრულების დისციპლინაც უნდა გაძლიერდეს.

მისი თქმით, მეტი გამჭვირვალეობისთვის შეიქმნება ციფრული ბაზა, სადაც მიმდინარე ინიციატივების შესახებ ინფორმაცია განახლდება