BBC-ის ჟურნალისტის ცნობით, ტაილანდის იმ ნაწილში, სადაც მღვიმედან ბავშვების გამოყვანის ოპერაცია მიმდინარეობს, ძლიერი წვიმაა. ჟურნალისტის ცნობით, უამინდობა იყო ერთ-ერთი მთავრი მიზეზი, რის გამოც ტაილანდის ხელისუფლებამ მღვიმედან ბავშვების გამოყვანის ოპერაცია დაიწყო.

ტაილანდელი ბავშვების გადასარჩენად დაწყებულ სამაშველო ოპერაციას ჟურნალისტებმა უკვე უწოდეს ომი წყლის წინააღმდეგ.

BBC მღვიმედან ბავშვების გამოყვანის გეგმას ავრცელებს, რომლის მიხედვითაც:

  • 12 ბიჭს რამდენიმე ჯგუფად გაყოფენ.
  • პირველ ჯგუფში 4 ადამიანი იქნება, დანარჩენ 3-ში კი სამ-სამი.
  • ერთ ბავშვთან ორი მაშველი იქნება.
  • მწვრთნელი ბოლო ჯგუფთან ერთად გამოვა.

სამაშველო ოპერაციის დაწყებამდე, მღვიმის მიმდებარე ტერიტორიიდან ყველა დამხმარე პერსონალი გაიყვანეს. ადგილზე დარჩნენ მხოლოდ მყვინთავები, ექიმები და სამხედროები. სამაშველო ოპერაციაში სულ 13 უცხოელი და 5 ტაილანდელი მყვინთავი მონაწილეობს. ოფიციალური უწყებების ცნობით, მღვიმიდან ბავშვების გამოყვანას რამდენიმე საათი დასჭირდება.

12 ბიჭი და მათი ფეხბურთის მწვრთნელი გამოქვაბულში 23 ივნისს აღმოჩნდნენ და აქამდე იქ არიან. ისინი ტურისტებისთვის კარგად ნაცნობ გამოქვაბულში საფეხბურთო ვარჯიშის შემდეგ მწვრთნელთან ერთად შევიდნენ, თუმცა მუსონური წვიმების გამო წყლის დონემ მოულოდნელად მოიმატა და გარეთ გამოსვლა ვეღარ მოახერხეს.

ტაილანდელი ბავშვების მღვინიდამ გამოყვანის შესახებ განახლებადი ინფორმაცია წაიკითხეთ ლინკზე.