გიგანტური ბუშტი, რომელშიც დონალდ ტრამპი ბავშვადაა წარმოჩენილი, აშშ-ს პრეზიდენტის ლონდონში ვიზიტისას გაერთიანებული სამეფოს პარლამენტთან იფრენს. თანხმობა ლონდონის მერმა უკვე გასცა.

აქტივისტები ტრამპის ვიზიტისას ლონდონში დიდ აქციას მართავენ, სახელად "Stop Trump" [შეაჩერე ტრამპი]. სწორედ ამ დღეს, 13 ივლისს, გაეშვება 6-მეტრის სიმაღლის სტაფილოსფერი ბუშტი ინგლისის დედაქალაქის თავზე.

ბუშტის გაშვების მოთხოვნით სადიქ ხანს 10 000-მა მოქალაქემ პეტიციით მიმართა, ათასობით ადამიანმა კი, კამპანიას 21 ათასზე მეტი დოლარი შეაგროვა.

"მერი მშვიდობიანი პროტესტის უფლებას მხარს უჭერს და ესმის, რომ სიტყვის თავისუფლების გამოხატვას სხვადასხვა ფორმები აქვს", - აცხადებს ლონდონის მერის წარმომადგენელი და ადასტურებს, რომ ბუშტი პარლამენტის ბაღიდან გაეშვება.

ბუშტის გაშვების მიზანი, აქტივისტების თქმით, ისაა, რომ ამერიკის პრეზიდენტი ბავშვივით იქცევა. ამიტომ აქვს მის ბუშტს ბავშვის ფორმა. უზარმაზარ სტაფილოსფერ ბუშტს ციცქნა ხელები აქვს, რომელშიც მობილური უჭირავს, მობილურის ეკრანი კი ტვიტერის ლოგოს ფერისაა.