უმრავლესობის დეპუტატის, რომან კაკულიას განცხადებით, იუსტიციის სამინისტროში გამოწვევებს ადასტურებს ის, რომ ხორავას ქუჩის საქმეზე პარლამენტში საგამოძიებო კომისია შეიქმნა.

"თუმცა ქალბატონი თეა წულუკიანის სუბიექტური მიზეზი რამდენად არის ამ რეალობის შექმნაში, ესაა გასარკვევი. თორემ არავი უარყოფს, რომ პრობლემები არსებობს", - განაცხადა კაკულიამ.

ქართული ოცნების ცენტრალურ ოფისში პრემიერ-მინისტრობის კანდიდატი მამუკა ბახტაძე უმრავლესობის წევრებს ხვდება. ბახტაძემ პარტიის წევრებს მინისტრთა კაბინეტის ახალი შემადგენლობა უნდა გააცნოს.

პრემიერ-მინისტრობის კანდიდატმა მამუკა ბახტაძემ დაადასტურა, რომ ის რამდენიმე უწყების გაერთიანებას გეგმავს და ამ საკითხზე აქტიური კონსულტაციები მიმდინარეობს. პრიორიტეტად პრემიერ-მინისტრობის კანდიდატმა მცირე ზომის, მაგრამ ოპერატიული და მოქნილი მთავრობა დაასახელა.

მინისტრთა კაბინეტის ახალი შემადგენლობის დასახელების შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს.

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა 13 ივნისს პრემიერ-მინისტრის თანამდებობა დატოვა და ამის მიზეზად გუნდში არსებული აზრთა სხვადასხვაობა დაასახელა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.