გირჩი მიიჩნევს, რომ გამართული მართლმსაჯულების სისტემის ჩამოსაყალიბებლად მნიშვნელოვანია ე.წ. მინი-სტრასბურგის საქართველოში მოწყობა. ამისთვის პოლიტიკური პარტია აუცილებელად მიიჩნევს საერთაშორისო გამოცდილების მქონე უცხოელი მოსამართლეების მოწვევას უზენაეს სასამართლოში, კოლეგიური განხილვისას 2-1-ის შეფარდებით ქართველ მოსამართლეებთან.

მართლმსაჯულების სისტემის რეფორმასთან დაკავშირებით პარტიის ხედვები ჟურნალისტებს დღეს გააცნო გირჩის ერთ-ერთმა დამფუძნებელმა იაგო ხვიჩიამ.

გირჩი მიიჩნევს, რომ საქართველოს სწრაფი და სანდო მართლმსაჯულება სჭირდება, ამისთვის:

  • პროკურატურა უნდა იყოს სასამართლო ხელისუფლების ნაწილი;
  • პოლიტიკური ხელისუფლება არ უნდა ნიშნავდეს და ათავისუფლებდეს მოსამართლეებსა და პროკურორებს;
  • უნდა არსებობდეს "მინი-სტრასბურგი" საქართველოში;
  • უნდა მოხდეს პროკურატურის დეცენტრალიზაცია.

იაგო ხვიჩიას თქმით, სწრაფი მართლმსაჯულების მისაღწევად უნდა გაიზარდოს მოსამართლეების რაოდენობა. გირჩის პროგრამის მიხედვით, ადმინისტრაციულ კოლეგიაში მოსამართლეთა რაოდენობა 2-ჯერ, ხოლო სამოქალაქო კოლეგიაში 3-ჯერ გაიზრდება.

ასევე გაიზრდება მოსამართლეების თანაშემწეების, კლერკების, რაოდენობა და ისინი მომავალი მოსამართლეები იქნებიან.

  • პირველ ინსტანციაში - 2 თანაშემწე;
  • სააპელაციო სასამართლოში - 3 თანაშემწე;
  • უზენაეს სასამართლოში - 4 თანაშემწე.

გირჩის პროგრამის მიხედვით, იუსტიციის საბჭო 6 წლით ვადით აირჩევა, ერთი პირი მხოლოდ ერთჯერადად აირჩევა, ან 6 წლის მერე ექნება ისევ საბჭოში არჩევის უფლება. საბჭოს 28 წევრი მოსამართლეებს უვადოდ აირჩევს, ასევე უვადოდ აირჩევენ პროკურორებსაც.

იაგო ხვიჩიას თქმით, მსგავსი მოდელი აქვს იტალიას, ბელგიას, საფრანგეთს და ა.შ.