მას შემდეგ, რაც პოლიციამ რუსთაველის გამზირიდან კარვების დაშლა და ტროტუარზე გადატანა დაიწყო, აქციაზე ოპოზიციური პოლიტიკური პარტიის წარმომადგენლები მივიდნენ.

ნაციონალური მოძრაობის ლიდერი ზაალ უდუმაშვილი შსს-ს გადაწყვეტილებას აკრიტიკებს და აცხადებს, რომ ხელისუფლება დაღუპული მოზარდების ოჯახებს მოჩვენებით თანაუგრძნობს.მისი თქმით, შსს-მ აქციიდან ხალხის მოტაცება დაიწყო.

"როგორ ეშინია ხელისუფლებას ორი შვილმკვდარი მამის, კანკალებენ შიშისგან, კარავს ვერ ადგმევინებენ შიშით, მერე ეთერში გამოდიან და მართლა ნიანგის ცრემლებს აღვარღვარებენ, როგორ უთანაგრძნობენ მალხაზს და ზაზას და რას უკეთებენ სინამდვილეში. ერთი ხელით ცრემლებს იწმენდენ და მეორე ხელით კარვებს ეჯაჯგურებიან", - განაცხადა ზაალ უდუმაშვილმა.

პოლიციამ პარლამენტის წინ გზის სავალ ნაწილზე განთავსებული კარვები პარლამენტის შენობის წინ გადაიტანა. კარვების გადატანას კი წინ უძღოდა ინციდენტი და აქციის მონაწილეების დაკავება.