ამ წუთებში პარლამენტში განიხილავენ ევროპული საქართველოს ინიციატივას ხორავას ქუჩის საქმეზე საგამოძიებო კომისიის შექმნის მიზანშეწონილობაზე.

კომისიის შექმნის საკითხის პლენარულ სხდომაზე განხილვის ინიციატივა ბიუროზე ევროპული საქართველოს დეპუტატმა ელენე ხოშტარიამ დააყენა.

ევროპული საქართველოს წევრის სერგო რატიანის თქმით, პირველი შემთხვევაა, რომ საგამოძიებო კომისია სისხლის სამართლის საქმეზე იქმნება. კომისიაში 17 წევრი იქნება და დეპუტატების კითხვებს პროკურორი ირაკლი შოთაძე უპასუხებს.

განსხვავებული აზრი აქვთ საპარლამენტო უმრავლესობას. ისინი ამ ეტაპზე საგამოძიებო კომისიის შექმნას არ ეთანხმებიან და ფიქრობენ, რომ საკითხის ამ ფორმატით განხილვა, პოლიტიკურ ჭრილში გადავა.

თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალიძის ნაწილში მუხლი შეუცვალეს. კერძოდ, მუხლი განზრახ მკვლელობიდან მკვლელობის მცდელობად გადაკვალიფიცირდა.

დავით სარალიძის მკვლელობაში ბრალდებული გამოძიებას არ ჰყავს და დაკავებულს ედავებიან მხოლოდ განზრახ მკვლელობის მცდელობას.