2010-იანების ერთ-ერთი ყველაზე პოპულარული დისტოპიური ტრილოგია გრძელდება. Divergent-ის ("განსხვავებული") პირველი წიგნის გამოცემიდან 15 წლისთავზე, ავტორმა ვერონიკა როთმა განაცხადა, რომ სულ მალე სერიას კიდევ ორი ტომი შეემატება. წიგნები ამბის ალტერნატიულ სიუჟეტს წარმოგვიდგენს, სადაც მთავარი გმირი, ტრის პრაირი, საკვანძო მომენტში განსხვავებულ არჩევანს აკეთებს. უფრო ზუსტად, ხუთ ფრაქციას შორის იგი შეუპოვრობას არ ირჩევს...

"ეს არც წინაისტორიაა, არც გაგრძელება, არც სპინ-ოფი და არც განსხვავებული პროტაგონისტის მოყოლილი ამბავი", — ხსნის როთი და ამბობს, რომ ერთი სული აქვს, როდის გაეცნობიან სერიის ერთგული გულშემატკივრები ახალ ისტორიას, — "ესაა Divergent-ის განსხვავებული სამყარო, სადაც ტრისი სხვა ფრაქციას ირჩევს. ვფიქრობ, საინტერესო იქნება პასუხი კითხვაზე, თუ ვინ იქნებოდა ტრისი, შეუპოვრობაზე რომ არ შეეჩერებინა არჩევანი".

ორწიგნეულის პირველი ნაწილი, სახელწოდებით The Sixth Faction ("მეექვსე ფრაქცია"), 6 ოქტომბერს გამოიცემა. შესაძლებელია მისი დამოუკიდებელ წიგნად წაკითხვაც — იმის მიუხედავად, იცნობთ თუ არა ორიგინალ ტრილოგიას.

ვერონიკა როთმა განსხვავებულის პირველი წიგნი 22 წლის ასაკში გამოსცა

ფოტო: David Livingston / Getty Images

ორიგინალი ტრილოგია კი, რომლის გამოცემაც როთმა 2011 წელს დაიწყო, YA ჟანრის (მოზარდული ლიტერატურის) ერთ-ერთი ყველაზე ცნობილი ნიმუშია. სერია მსოფლიოში 40 მილიონზე მეტ ეგზემპლარად გაიყიდა და ათობით ენაზე ითარგმნა, მათ შორის, ქართულად. პირველი წიგნი, განსხვავებული, 2015 წელს დაბეჭდა გამომცემლობა სიესტამ (თარგმნა ნინო შეყილაძემ), 2017 წელს კი გამოიცა მეორე ტომი, მეამბოხე (თარგმნა ნანო სარალიშვილმა).

განსხვავებულში მოქმედება პოსტაპოკალიფსურ ჩიკაგოში ვითარდება, სადაც საზოგადოება ხუთ ფრაქციად არის დაყოფილი — თითოეული მათგანი თავისი უმთავრესი ღირებულებებით ცხოვრობს: შეუპოვრობა, გულწრფელობა, ერუდიცია, მეგობრულობა და ასკეტობა. ამ დისტოპიურ საზოგადოებაში ყველა მოზარდი, რომელსაც 16 წელი შეუსრულდება, ვალდებულია, ფრაქციებიდან რომელიმე ამოირჩიოს და მას შეუერთდეს.

განსხვავებულის ტრილოგიის მიხედვით ჰოლივუდში გადაიღეს ფილმების სერია, სადაც მთავარი როლები შეილინ ვუდლიმ და თეო ჯეიმსმა შეასრულეს. სერიის ეკრანიზაცია არ დასრულებულა, მაგრამ სამმა ფილმმა ჯამში $765 მილიონი გამოიმუშავა.

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...