თურქეთის ოფიციალურ პირებზე დაყრდნობით BBC იუწყება, რომ ქვეყნის მთავრობამ 15 ივლისს მომხდარი სახელმწიფო გადატრიალების მცდელობის წინააღმდეგ შემუშავებული ღონისძიებებიდან გამომდინარე, განათლების სფეროში დასაქმებულ პირებს დროებით უცხოეთში მოგზაურობა აუკრძალა.

50 ათასზე მეტი ადამიანი დაკავებული ან გათავისუფლებულია. მათგან 21 ათასი მასწავლებელია.

თურქეთის დედაქალაქ ანკარაში პრეზიდენტი რეჯეპ ტაიპ ერდოღანი შეხვედრებს მართავს ეროვნული უსაფრთხოების საბჭოსთან და მთავრობის წარმომადგენლებთან.

სახელმწიფო გადატრიალების მცდელობის შემდეგ, ერდოღანი ანკარაში გუშინ დაბრუნდა.

BBC-ის ჟურნალისტის ნიკ ტორპის ინფორმაციით, დაგეგმილი შეხვედრები დიალოგის გამართვის პირველი მცდელობაა პრეზიდენტსა და მთავრობის წარმომადგენელებს შორის.

21 ათას მასწავლებელს, განათლების სამინისტროს 15 ათას თანამშრომელს და უნივერსიტეტების 1 577 დეკანს თანამდებობის დატოვება მოუწია.