17 მაისს ჰომოფობიასა და ტრანსფობიასთან ბრძოლის საერთაშორისო დღეს, საქართველოს საპატრიარქო ოჯახის სიწმინდის დღეს ამაღლების დღესასწაულთან ერთად აღნიშნავს. საპატრიარქოს ჟურნალის, კარიბჭის ცნობით, თბილისის ყველა ტაძრის მღველმსახური, თავიანთ მრევლთან ერთად 12 საათისათვის შეიკრიბება ვარდების რევოლუციის მოედანზე.

მანიფესტაციის მონაწილეები, რუსთაველის გამზირის გავლით, ქაშუეთის ეკლესიასთან დაგეგმილ ღონისძიებაში მიიღებენ მონაწილეობას. შემდეგ მარში გეზს აიღებს სამების ეკლესიისკენ, სადაც საყოველთაო ჯვრისწერა გაიმართება.

თბილისის მერიაში On.ge-ს უთხრეს, რომ საპატრიარქოსგან მათ აქციის ჩატარების ნებართვაზე თხოვნა ჯერჯერობით არ მიუღიათ.

სამღვდელოებამ მრევლთან ერთად ოჯახის სიწმინდის დაცვის დღე გასულ წელსაც აღნიშნა. პარალელურად, გასული წლის 17 მაისის აქცია ძალადობის წინააღმდეგ, მთავრობის კანცელარიის წინ, მხოლოდ ერთ საათს გაგრძელდა, რა დროსაც უსაფრთხოების ზომები მაქსიმალურად იყო გამკაცრებული. პოლიციას ადგილზე შესასვლელი ყველა გზა კორდონებით ჰქონდა გადაკეტილი.

ილია მეორემ 17 მაისი ოჯახის სიწმინდისა და მშობლების პატივისცემის დღედ მას შემდეგ გამოაცხადა, რაც ლგბტ თემის წევრებმა ჰომოფობიასთან ბრძოლის დღის საჯაროდ აღნიშვნა დაიწყეს. ამ დღეს ლესბოსელები, გეები, ბისექსუალები, ტრანსგენდერი პირები, ინტერსექსები და ქვიარები მხარდამჭერებთან ერთად ეკონომიკური და სოციალური თანასწორობისთვის საბრძოლველად გამოდიან.

2013-ში ლგბტ თემის წარმომადგენლების მცდელობას, აქცია ჩაეტარებინათ პუშკინის სკვერში, სამღვდელოებისა და მოქალაქეების მხრიდან ძალადობრივი დაპირისპირება მოყვა. ფიზიკური დაპირისპირება მოხდა 2012 წლის 17 მაისსაც, როცა მსვლელობის მონაწილეებს რუსთაველის გამზირთან გზა გადაუღობეს მართლმადიდებელ მშობელთა კავშირისა და ვახტანგ გორგასლის კავშირის წევრებმა.

ამავე თემაზე: