ქართული ოცნების დეპუტატის, დავით ჭიჭინაძის თქმით, ქართული მარშის წევრებისთვის თავდებში ჩადგომა დაკავებული მშობლებმა სთხოვეს. ამის შესახებ მან On.ge-სთან განაცხადა.

"ვფიქრობ, ჯობია საზოგადოებაში ის შთაბეჭდილება არ დარჩეს, რომ ვიღაცა მხოლოდ დასჯაზეა ორიენტირებული. ყველანაირად ვცდილობთ ყველას მივცეთ შანსი, რომ გარეთ იყვნენ, მე ვფიქრობ, ასეთი დანაშაული ნამდვილად არ არის", - ამბობს ჭიჭინაძე.

On.ge-ს კითხვაზე აქვს თუ არა დეპუტატს ინფორმაცია რა დანაშაულზე მიმდინარეობს პროცესი, დეპუტატი პასუხობს:

"მე როგორც ვიცი, რელიგიურ შეურაცხყოფასთან დაკავშირებული რეაქცია ჰქონდათ მაგათ".

დეპუტატს არ აქვს ინფორმაცია იმის შესახებ, რომ 19 მარტს რუსთავი 2-თან აქციაზე ჟურნალისტს დავით ერაძეს სცემეს.

"იქ ცემა, როგორც ვიცი, არავინ არ უცემიათ. ვიცი, რომ უბრალოდ იყო დაპირისპირება სიტყვიერი და მანქანა დაზიანდაო, მაგაზე იყონ საუბარი, თორე ცემაზე არ ყოფილა საუბარი", - განაცხადა ჭიჭინაძემ.

როგორც დავით ჭიჭინაძე ამბობს, გადაწყვეტილების მიღებისას საქმეს სრულად არ გაცნობია და მხოლოდ ტელევიზიით მიღებული ინფორმაცია ჰქონდა.

დეპუტატის თქმით, ოჯახის წევრებს მისთვის დეტალები არ გაუცნიათ და წერილობით მიმართეს შუადმგდომლობაზე. მისივე თქმით, ეს ერთი ჩვეულებრივი ფორმაა, როგორც გირაოთი გათავისუფლება და ის არ ითხოვდა მარშის წევრების გამართლებას ან გამტყუნებას:

"მთხოვეს, რომ იყვნენ გარეთ სანამ სასამართლო მიმდინარეობს და მაშინ ვერაფერს ვხედავ ცუდს. მაინც სასამართლოს გადასაწყვეტია დამნაშავედ ცნობს თუ არა".

ქართული მარშის ლიდერის, სანდრო ბრეგაძის განცხადებით, პარლამენტის რამდენიმე დეპუტატი ქართული მარშის დაკავებული წევრების თავდებით გათავისუფლებას ითხოვს.

მარშის წევრებს თავდებში უდგებიან: ქართული ოცნების წევრები გია ჟორჟოლიანი და დავით ჭიჭინაძე, პატრიოტთა ალიანსის წევრები ადა მარშანია და ემზარ კვიციანი. ასევე, თავდებში უდგება თიანეთის მერი თამაზ მეჭიაური.

ქართული მარშის წევრების დაკავება

19 მარტს რუსთავი 2-ის ოფისის ეზოში შენობასთან შეკრებილმა ნეონაცისტური დაჯგუფების, ქართული მარშის წევრებმა, ალყა შემოარტყეს ავტომობილს, რომელშიც ჟურნალისტი გიორგი გაბუნია და არხის იურისტი თამთა მურადაშვილი იმყოფებოდნენ. მათ სიტყვიერი შეურაცხყოფა მიაყენეს გიორგი გაბუნიას და შენობაში შესვლის შესაძლებლობა არ მისცეს.

პატიმრობა შეეფარდათ სისხლის სამართლის საქმეზე დაკავებულ გიორგი ონიანს, ლუკა ნაცვლიშვილს, მიხეილ ამისულაშვილს, ლადო სადღობელაშვილს, ირაკლი დოლენჯაშვილს და ბექა რევაზიშვილს. ყველა მათგანს ბრალად ედებათ ხულიგნობა.

ამასთან გიორგი ონიანს ასევე ბრალად ედება ძალადობა (ცემა), რამაც დაზარალებულის ფიზიკური ტკივილი გამოიწვია, მაგრამ არ მოჰყოლია სსსკ-ის 120-ე (ჯანმრთელობის განზრახ მსუბუქი დაზიანება) მუხლით გათვალისწინებული შედეგი. ასევე ლუკა ნაცვლიშვილს გამოძიება სხვისი ნივთის განზრახ დაზიანებას ედავება, რამაც მნიშვნელოვანი ზიანი გამოიწვია.