საქართველოს პრეზიდენტის, გიორგი მარგველაშვილის ყოველწლიური საპარლამენტო მოხსენების დაწყებამდე პარლამენტარები საუბრობენ იმ საკითხებზე, რისი მოსმენის მოლოდინიც გიორგი მარგველაშვილისგან აქვთ.

დეპუტატ, სოფიო კილაძის განცხადებით, ის შესაძლო კითხვებზე პრეზიდენტის მოხსენების დასრულების შემდეგ იფიქრებს.

კილაძეს იმედი აქვს, რომ პრეზიდენტი ყველა საკითხზე ობიექტურად ისაუბრებს.

"დაველოდები, რას იტყვის პრეზიდენტი და რა საკითხებზე გაამახვილებს ყურადღებას. თუ პრეზიდენტს ობიექტურობა შერჩა მან შეწყალების თემაზე აუცილებლად უნდა ისაუბროს, თავსი პოზიციიდან გამომდინარე", - განაცხადა სოფიო კილაძემ.

დღეს პარლამენტში საქართველოს მეოთხე პრეზიდენტის, გიორგი მარგველაშვილის ბოლო საპარლამენტო ანგარიშს მოისმენენ. მოხსენების შემდეგ სხდომათა დარბაზში დებატები გაიმართება.

პრეზიდენტის საპარლამენტო მდივნის განცხადებით, მარგველაშვილი დებატებში მონაწილეობის მისაღებად მზად არის. მანამდე კი პრეზიდენტი საკუთარ გამოსვლაში ყურადღების გამახვილებას რამდენიმე მნიშვნელოვან თემაზე აპირებს, მათ შორის არის ადამიანის უფლებების დარღვევა, მედიაზე ზეწოლა, გამოუძიებელი გახმაურებული საქმეები და ქვეყნის საშინაო-საგარეო პოლიტიკა. მის მოხსენებას პარლამენტში პრეზიდენტის ადმინისტრაცია სრული შემადგენლობით დაესწრება.