დღეს, 24 აპრილს, ჩემპიონთა ლიგის ნახევარფინალური შეხვედრა გაიმართება ლივერპულსა და რომას შორის. აღსანიშნავია, რომ მერსესაიდელთა ეგვიპტელი ლიდერი მოჰამედ სალაჰი წინა სეზონში სწორედ რომას ღირსებას იცავდა.

ლივერპულის მწვრთნელის იურგენ კლოპის თქმით, სალაჰს რომაელებისგან მეგობრული შეხვედრა არ ელის.

"მო (სალაჰი) მალე გაიგებს, რომ ისინი (რომაელები) მისი თანაგუნდელები აღარ არიან".

"იტალიელი მცველები ცნობილი არიან იმით, რომ დიდად მეგობრულად არ თამაშობენ, თუმცა პასუხის გაცემა სალაჰსაც შეუძლია, ცხადია, საფეხბურთო გაგებით", - განაცხადა კლოპმა.

კლოპმა მეტოქე გუნდი შეაქო და აღნიშნა, რომ მაყურებლებს კარგი ფეხბურთი ელით.

"ბარსელონასთან პირველ შეხვედრაში განცდილი მარცხის შემდეგ, არავინ ელოდა, რომ რომაელები "ქამბექს" მოახერხებდნენ. მათი შემადგენლობა სრულ მზადყოფნაშია. შეტევაში არაერთი ვარიანტი აქვთ, გარდა ამისა, ძლიერი დაცვითა და კარგი გარემარბებითაც გამოირჩევიან".

"ეს ნახევარფინალი ორივე გუნდისთვის დიდი მოვლენაა. თქვენ გამარჯვებამოწყურებულ ორ გუნდსა და კარგ ფეხბურთს იხილავთ".