5 აპრილს, 15:00 საათზე, ილიას სახელმწიფო უნივერსიტეტის წიგნის სახლ "ლიგამუსში" ამერიკელი მოსამართლე, ელისონ დანქენი, საჯარო ლექციას გამართავს. ლექციის თემა "მოსამართლეებთან კომუნიკაციის წესები და პოლიტიკა: 21-ე საუკუნის ტექნოლოგიების გამოწვევა" იქნება.

საჯარო ლექცია აშშ-ს განვითარების სააგენტოს (USAID) მიერ დაფინანსებული პროგრამის "კანონის უზენაესობის მხარდაჭერა საქართველოში" (PROLoG) ფარგლებში ჩატარდება, რომელსაც აღმოსავლეთ-დასავლეთის მართვის ინსტიტუტი ახორციელებს.

საჯარო ლექციის სამუშაო ენა ინგლისური იქნება, თუმცა უზრუნველყოფილი იქნება თარგმანიც. ლექციაზე დასწრება ნებისმიერ მსურველს შეუძლია.

ელისონ დანქენის ბიოგრაფია

მოსამართლე ელისონ დანქენი მეოთხე ფედერალური ოლქის სააპელაციო სასამართლოს მოსამართლედ, 2003 წლის 15 აგვისტოს, პრეზიდენტ ჯორჯ ბუშის წარდგინებით დაინიშნა. მან სწრაფად მოიპოვა აშშ-ში ორივე პარტიის მხარდაჭერა და მოსამართლედ წარდგენიდან მალევე სენატმა მისი კანდიდატურა აშშ-ის ფედერალური ოლქის სააპელაციო სასამართლოს მოსამართლის თანამდებობაზე დაამტკიცა.

სენატორმა ჯონ ედვარდმა მის შესახებ აღნიშნა: „იგი საოცარი ინტელექტისა და შესაძლებლობები ქალია, რომელიც პატივს სცემს კანონს, იბრძვის სამართლიანობისთვის და არასდროს იღებს პოლიტიკურ გადაწყვეტილებებს“.

მოსამართლე დანქენი პირველი აფროამერიკელი ქალია, რომელიც ჩრდილოეთ კაროლინას სააპელაციო სასამართლოში მოსამართლედ დაინიშნა და რომელიც ჩრდილოეთ კაროლინას ადვოკატთა ასოციაციის პრეზიდენტად აირჩიეს. ამჟამად იგი მეოთხე ფედერალური საოლქო სააპელაციო სასამართლოს მოსამართლე პირველი აფროამერიკელი ქალია.

მოსამართლე დანქენი აქტიურად არის ჩართული მართლმსაჯულების სექტორის გაძლიერებასა და, ზოგადად, საზოგადოებრივ საქმიანობაში. იუსტიციის საბჭოს თავმჯდომარის, ჯონ რობერტსის გადაწყვეტილებით, იგი თავმჯდომარეობს აშშ-ის მოსამართლეთა კონფერენციის მართლმსაჯულების სექტორის საერთაშორისო ურთიერთობების კომიტეტს, რომელიც კოორდინირებას უწევს ფედერალური სასამართლოების ურთიერთობებს სხვა სახელმწიფოს სასამართლოებსა და იმ ორგანიზაციებთან, რომლებიც მართლმსაჯულების სექტორში მუშაობენ.

იგი არის ფედერალური მოსამართლეების ასოციაციის ყოფილი პრეზიდენტი და წევრი. დუკის უნივერსიტეტის სამეთვალყურეო საბჭოს წევრის სტატუსით ამჟამად თავმჯდომარეობს ამ უნივერსიტეტის აკადემიურ კომიტეტს. არის კაროლინას შტატის საბალეტო აკადემიის სამეთვალყურეო საბჭოს წევრიც.