სახელმწიფო უსაფრთხოების სამსახურის ინფორმაციით, სირიისა და ერაყის ტერიტორიაზე სხვადასხვა ტერორისტულ ორგანიზაციაში საქართველოს, დაახლოებით, 30 მოქალაქე იბრძვის. უწყების განმარტებით, 2017 წლის განმავლობაში ამ პირებიდან საქართველოში არავინ დაბრუნებულა.

სუს-ის 2017 წლის ანგარიშის მიხედვით, საქართველოში ტერორიზმის დაფინანსების მცდელობები, ექსტრემისტული და ტერორისტული იდეების მხარდაჭერისა და ცალკეული მოქალაქეების რადიკალიზაციის ფაქტები გამოვლინდა.

"ისლამური სახელმწიფოს, სხვა ქვეყნების მსგავსად, შესაძლოა, საქართველოში ჰყავდეს ცალკეული მხარდამჭერები, რომლებიც, საჭიროების შემთხვევაში, იმოქმედებენ ტერორისტული ორგანიზაციის მხრიდან მიღებული დავალების შესაბამისად", - ნათქვამია განცხადებაში.

უწყების განცხადებით, 2017 წელს გამოვლინდა მცხოვრები უცხო ქვეყნის მოქალაქე სტუდენტთა ჯგუფი, რომლებიც სოციალური ქსელების მეშვეობით აქტიურად ავრცელებდნენ რადიკალურ მოწოდებებს.

საანგარიშო პერიოდში, კონტრტერორისტულმა ცენტრმა გამოძიება დაიწყო სისხლის სამართლის ექვს საქმეზე. ერთ-ერთი საქმე ისნის სპეცოპერაციია, რომლის დროსაც აჰმედ ჩატაევი გარდაიცვალა.

მათივე განმარტებით, ტერორიზმთან შესაძლო კავშირის მქონე რამდენიმე ათასი პირი დადგინდა, რომლებსაც, შესაძლოა, საქართველოს ტერიტორია ტრანზიტულად გამოყენება სცადონ.

როგორც ანგარიშში წერია, საქართველოში ისლამური სახელმწიფოს მხარდამჭერთა რაოდენობა და გავლენები შემცირდა.

უწყების განცხადებით, რუსეთის მიერ ოკუპირებული ტერიტორიებიდან მომავალი საფრთხეები მნიშვნელოვან გამოწვევას წარმოადგენს:

"იკუპირებულ ცხინვალსა და სოხუმში შექმნილი, საქართველოს ცენტრალური ხელისუფლებისთვის უკონტროლო ვითარება რუსეთის ფედერაციის სპეცსამსახურებს საშუალებას აძლევს საკუთარი ოპერატიული, სამხედრო თუ პოლიტიკური მიზნების შესაბამისად განახორციელონ სხვადასხვა ტერორისტული აქტივობების ინიცირება/ინსცენირება".

გაიგეთ მეტი: