"მარადიული ღირებულებები რომელიც კაცის მხრიდან ქალის პატივისცემას გულისხმობს ჩემთვის ბევრად უფრო ძვირფასია ვიდრე გენდერული ბალანსი თუ ის ფსევდო თანასწორობის დაზეპირებული "ღირებულებები" რომელიც ენჯეოების წიაღში საგრანტო პროგრამებით ისწავლება", - ასე გამოეხმაურა ქართული ოცნების საკრებულოს დეპუტატი ვატო შაქარიშვილი ომბუდსმენის დასკვნას იმის შესახებ, რომ მის მიერ გაკეთებული განცხადება სექსისტური შინაარსის იყო.

ვატო შაქარიშვლი ფეისბუქ სტატუსში წერს რომ ის აღიარებს მხოლოდ შესაძლებლობების თანასწორობას. მისივე თქმით, გენდერული გათანაბრების მცდელობა ფსევდოლიბერალური ღირებულებაა და ადამიანის ბუნების წინააღმდეგ არის მიმართული.

საქართველოს სახალხო დამცველმა კრიტიკულად შეააფასა შაქარიშვილის შეურაცხმყოფელი რეპლიკა - "რა არის ეს? ბოზი ქალებივით ყვირით", - რომლითაც მან საჯარო განხილვისას ოპონენტებს ახალი საქართველოს ლიდერს, გიორგი ვაშაძეს და ევროპული საქართველოს წევრს, ელენე ხოშტარიას მიმართა.

თბილისის გენერალურ გეგმასთან დაკავშირებულ საჯარო განხილვაზე ქართული ოცნებისა და ოპოზიციის წარმომადგენლებს შორის სიტუაცია მას შემდეგ დაიძაბა, რაც კახი კალაძემ ელენე ხოშტარიას საუბარი შეაწყვეტინა.

მოგვიანებით, შაქარიშვილმა ბოდიში მოუხადა ელენე ხოშტარიას და აღნიშნა, რომ ხოშტარიასთვის არ მიუყენებია შეურაცხყოფა, თუმცა მისი რეაქციას ადეკვატურად მიიჩნევდა გიორგი ვაშაძის მიმართ.