დღეს, შაბათის კურიერში საუბრისას რუსთავი 2-ის გენერალურმა დირექტორმა ნიკა გვარამიამ თქვა, რომ ილია მეორესთან შეხვედრის შემდეგ, აპირებს პრეზიდენტსაც შეხვდეს დეკანოზ მამალაძის შეწყლებაზე სასაუბროდ.

ნიკა გვარამიამ ილია მეორესთან შეხვედრის დეტალები გაიხსენა:

"მან[ილია მეორემ] მითხრა, რომ არ იცის ბოლომდე ეს საქმე, რადგან ბევრი ახსნა და სიმართლე მივიღეო, ბევრი პოზიცია მოვისმინე და მაინტერესებს, შენ რას ფიქრობო. მე ვუთხარი რომ დარწმუნებული ვარ, ეს ადამიანი უდანაშაულოა - მეთქი. შემდეგ მომაყოლა, რატომ მგონია, რომ უდანაშაულოა. ვუთხარი, რომ ვაპირებ პრეზიდენტთან საუბარს, მისვლას, შეხვედრის თხოვნას და საუბარს დეკანოზ მამალაძის შეწყალებასთან დაკავშირებით. მან მკითხა, ხომ არ იცი, რატომ არ არის ამდენი ხანი დეკანოზი შეწყალებული, რაზეც ვუთხარი, რომ არ მაქვს ინფორმაცია, მაგრამ ვაპირებ პრეზიდენტთან საუბარს. მითხრა, რომ, თუ მე დარწმუნებული ვარ ჩემს პოზიციაში და ვთვლი საჭიროდ, რომ უნდა მივიდე, ეს აუცილებლად უნდა გავაკეთო და მე ამას გავაკეთებ".

ნიკა გვარამია სტრასბურგის სასამართლოში დეკანოზ გიორგი მამალაძის ინტერესებს დაიცავს. ამ საკითხზე ის ციხეში დეკანოზსაც შეხვდა.