"ყველა მონაცემი გვაქვს იმისთვის, რომ დაბეჯითებით აღვნიშნოთ, მსოფლიო ჯანდაცვის ორგანიზაციის მონაცემებში მოცემული დაბინძურებული ჰაერის ხარისხი და პრობლემატიკა არ შეესაბამება იმ რეალობას, რომელიც დღეს საქართველოშია", - ამის შესახებ გარემოსა და ბუნებრივი რესურსების მინისტრის მოადგილემ, თემურ მურღულიამ განაცხადა და განმარტა, რომ აღნიშნულს მსოფლიო ბანკის მონაცემების ადასტურებს.

დღეს განათლების ცენტრში გარემოსა სამინისტროს წარმომადგენლებმა, სამთავრობო და არასამთავრობო სექტორთან ერთად, ატმოსფერული ჰაერის დაბინძურების და ადამიანის ჯანმრთელობასა და გარემოზე მისი ზეგავლენის შემცირების საკითხებზე იმსჯელეს, სადაც განმარტეს, რომ გაფრქვეული დამბინძურებლების უდიდესი წილი სატრანსპორტო სექტორზე მოდის.

შეხვედრაზე აღნიშნეს, რომ ყველზე მწვავე მდგომარეობა თბილისშია, სადაც ქვეყნის ავტოპარკის დაახლოებით 40%-ია თავმოყრილი. ღონისძიებაზე ჰაერის ხარისხის არსებული მდგომარეობის გასაუმჯობესებლად სხვადასხვა სექტორიდან მავნე ნივთიერებების გამოყოფის ინტენსივობისა და მოცულობის შემცირების გზებიც განიხილეს.

საავტომობილო ექსპერტი, შალვა ოგბაიძემ ამბობს, რომ გარემოს დაცვის სამინისტროდან მიწოდებული ინფორმაციით ირკვევა, რომ ატმოსფერული ჰაერის მთავარი დამბინძურებელი ავტოტრანსპორტია:

"მით უმეტეს ჩვენი ავტოპარკი, როგორ მდგომარეობაშია, რა ასაკისაა, როდესაც შეჩერებულია ჩვენს ქვეყანაში ავტომობილების სავალდებულო ტექ-დათვალიერება".

შეხვედრა გარემოს სამინისტროს ორგანიზებით გაიმართა, რომელსაც სტრატეგიული კვლევების და განვითარების ცენტრი, გარემოსდაცვითი ორგანიზაცია ეკოვიზია, მწვანეთა მოძრაობა/დედამიწის მეგობრები, მწვანე ალტერნატივა, CENN, საქართველოს ტრანსპორტისა და გზების ასოციაცია, სახმელეთო ტრანსპორტის სააგენტო, დაავადებათა კონტროლის ცენტრი, საკრებულოსა და სხვადასხვა სამინისტროს წარმომადგენლები ესწრებოდნენ.

28 ივნისს International Energy Agency-მ კვლევის შედეგები გამოაქვეყნა, რომლის თანახმადაც საქართველო პირველია ჰაერის დაბინძურებით გამოწვეული სიკვდილიანობის მიხედვით 100 ათას მოსახლეზე. ატმოსფერული ჰაერის დაბინძურების მთავარ მიზეზად ორგანიზაცია გაუმართავ და უხარისხო საწვავზე მომუშავე ავტომობილებს ასახელებენ.

IEA: საქართველო ჰაერის დაბინძურებით გამოწვეული სიკვდილიანობით პირველ ადგილზეა