ბურჭულაძის პარტიის განცხადებით, მისი პარტიის მიზანია ეკონომიკის 10%-იანი ზრდა, 3 მილიარდამდე პირდაპირი უცხოური ინვესტიციები, 8 მილიონი ტურისტი, კერძო სექტორში დასაქმებულთა რაოდენობის 250 000-ით გაზრდა და ის, რომ ყოველი მესამე ღარიბი ადამიანი დაძლევს სიღარიბეს.

პარტიამ, პაატა ბურჭულაძე - მოძრაობა სახელმწიფო ხალხისთვის, ეკონომიკური განვითარების პროგრამის პრეზენტაცია დღეს გამართა. მათი ძირითადი აქცენტი შეეხება დასაქმებას, ჯანდაცვას, სოციალურ პოლიტიკას, ტურიზმს, სოფლის მეურნეობას, ენერგეტიკასა და გარემოს დაცვას.

ბურჭულაძის პარტიის ეკონომიკური განვითარების გეგმის მიხედვით:

  • საშემოსავლო და მოგების გადასახადები 15%-მდე შემცირდება;
  • მცირე ბიზნესის ბრუნვაზე დაწესებული გადასახადი 2% გახდება;
  • სიღარიბის ზღვარს ქვემოთ მყოფი მოსახლეობის შემწეობა 50%-ით გაიზრდება;
  • ხოლო პენსია 250 ლარამდე გაიზრდება;
  • ჯანდაცვის პროგრამით, მიზნობრივ ჯგუფებს მედიკამენტებზე ხელმისაწვდომობა გაეზრდებათ და დაზღვევის პაკეტი გახდება 240 ლარი.

ბურჭულაძის პარტიის დაპირებით, რეინვესტირების მოგება გათავისუფლდება დაბეგვრისგან. მეწარმეთა სტიმულირებისთვის გაიზრდება მიკრო და მცირე ბიზნესის განმსაზღვრელი წლიურ ბრუნვაზე დაწესებული ლიმიტები. ხოლო, სიღარიბის ზღვარს ქვემოთ მყოფ მოსახლეობას, მათი არჩევის შემთხვევაში, მომდევნო ოთხი წლის განმავლობაში, გადახედვის გარეშე შეუნარჩუნდება მინიჭებული სტატუსი.

ამას გარდა, პარტია პაატა ბურჭულაძე - მოძრაობა სახელმწიფო ხალხისთვის, ამომრჩეველს ჰპირდება, რომ საქართველოში წარმოებული პროდუქციის პოპულარიზაციისა და ექსპორტის გაზრდის მიზნით, შეიქმნება ერთობლივი "ქართული" ბრენდი.