გაყიდვების სახლი ინტერმედია აცხადებს, რომ სარეკლამო ბაზარი 15 პროცენტით შემცირდა და კომუნიკაციების ეროვნული კომისიის მიერ გამოქვეყნებული მონაცემები არასწორადაა დათვლილი. ინტერმედია გასულ წელს ტელეკომპანია იმედსა და რუსთავი 2-ს სარეკლამო დროს უყიდდა.

"იმისთვის, რომ ეს მეთოდოლოგია იყოს სწორი, ყველა სარეკლამო დამკვეთის სარეკლამო დანახარჯები უნდა გააანალიზდეს... წინააღმდეგ შემთხვევაში ესეთი ტიპის ანალიზი არის არასწორი", - განაცხადა ინტერმედიის წარმომადგენელმა.

კომისიამ ტელეკომპანიების შემოსავლების შემცირება იმედისა და რუსთავი 2-ის მიერ საერთო სარეკლამო კომპანიის შექმნას დაუკავშირა. ინტერმედია კი ამტკიცებს, რომ სეილსჰაუსების ფინანსური დოკუმენტაცია გამჭვირვალეა არხებისთვის და თანხები სეილსჰაუსებში არ დაგროვებულა:

"შემცირდა პოლიტიკური პარტიების დანახარჯები; შარშან მაესტროს გათვლები იყო არასწორი; სატელევიზიო ბიუჯეტის მოცულობები კომპანიებში სულ უფრო მცირდება, რაც გლობალური ტრენდია და სულ უფრო მეტი თანხა მიდის დიჯიტალში."

თუ კომუნიკაციების კომისიის მიერ გამოქვეყნებულ დეკლარირებულ შემოსავლებს შევადარებთ ერთმანეთს, ჩანს, რომ 2016 წელს მაუწყებლების შემოსავალი - 86 128 264 ლარი იყო, 2017 წელს მონაცემები დაახლოებით 12 მილიონზე მეტით შემცირდა და 73 982 546 ლარი გახდა. ამავე პერიოდში საზოგადოებრვი მაუწყებლის შემოსავალი 44,1 მილიონიდან 44,6 მილიონ ლარამდე გაიზარდა.