საქართველოს შინაგან საქმეთა სამინისტროს ინფორმაციით, საპატრულო პოლიციის თანამშრომლების სამხრე ვიდეოკამერები მოძველებულია. უწყებაში აღნიშნავენ, რომ ამ მიზეზით, ხშირად ჩაწერილი ფაილებს ტექნიკური წუნი აქვთ, ვერ ხდება საჭიროების შემთხვევაში ჩანაწერების მოძიება და შესწავლა.

"ზემოაღნიშნული პრობლემების გადაჭრისა და დანაშაულთან ბრძოლის ეფექტურობის ამაღლების მიზნით, შს სამინისტროს ხელმძღვანელობის მიერ ინიცირებული იქნა სამხრე კამერების სისტემის უმოკლეს ვადებში განახლების პროექტი, რომელიც ითვალისწინებს, საპატრულო პოლიციისათვის თანამედროვე მოთხოვნებთან შესაბამისი პერსონალური
ვიდეო-სამეთვალყურეო სისტემის მოწყობას", - აღნიშნა სამსახურეობრივ პატაკში შსს-ს ეკონომიკური დეპარტამენტის დირექტორმა, თია მელაძემ.

მისივე განმარტებით, კამერის ელემენტების მარგი ქმედების კოეფციენტი მნიშვნელოვნადაა დაქვეითებული, კამერები მეხუთე წელია ხმარებაშია და უმეტესობას ეწურება სასიცოცხლო ციკლი, რის გამოც ვეღარ პასუხობს თანამედროვე მოთხოვნებს.

ფოტო: შინაგან საქმეთა სამინისტრო

სასამართლო სხდომების გამართვისას დაცვის მხარეს არაერთხელ მოუთხოვია შსს-გან პატრულის სამხრე კამერებით გადაღებული მასალების გასაჯაროება, თუმცა, რიგ შემთხვევაში ჩანაწერები სრულად არ ასახავდა პირის დაკავების მომენტს, ან საერთოდ არ იყო ჩაწერილი. მსგავსი შემთხვევა იყო ელისო კილაძის შვილის დაკავების დროსაც, როცა მას ნარკოტიკული საშუალებების ფლობას ედავებოდნენ.