იაპონიის მთავრობამ და კორპორაცია მიცუბიშმა საქართველოს 96 ერთეული ელექტრო და ჰიბრიდულ ავტომანქანა გადასცა.

96-ვე ავტომანქანა შინაგან საქმეთა სამინისტროს გადაეცა, კერძოდ, 45 ჰიბრიდული ავტომანქანა - თბილისის საპატრულო პოლიციას, ხოლო დანარჩენი 51 ელექტრომობილი სხვადასხვა დეპარტამენტზე გადანაწილდა.

ფოტო: შინაგან საქმეთა სამინისტრო

ავტომანქანების გადაცემის ღონისძიებაზე, რომელსაც იაპონიის დელეგაცია ესწრებოდა, შს მინისტრმა, გიორგი გახარიამ მადლობა გადაუხადა იაპონიის მთავრობასა და კორპორაცია მიცუბიშს საჩუქრისთვის. ასევე, მადლობა გადაუხადა გიორგი კვირიკაშვილს, რადგან გახარიას თქმით, სწორედ პრემიერის ინიციატივა იყო ნაჩუქარი ავტოპარკი შსს-ს გადასცემოდა.

შინაგან საქმეთა სამინისტროს განცხადებით, უწყება გარემოსთან მეტად თავსებადი ავტომანქანებით ავტოპარკის განახლების პირველ ეტაპს იწყებს.

შსს-ს ცნობით, 2015 წელს იაპონიის მთავრობამ საქართველოს მთავრობას გადასცა არასაპროექტო საგრანტო დახმარება (Non-Project Grant Aid), რომელიც მიზნად ისახავდა ახალი თაობის ეკოლოგიურად უსაფრთხო ავტომობილების შეძენას.

აღნიშნული გრანტის ფარგლებში, იაპონიის საერთაშორისო თანამშრომლობის სისტემებმა (JICS) კორპორაცია მიცუბიშისთან დადებული ხელშეკრულების საფუძველზე შეიძინა 96 ავტომობილი.

როგორც გიორგი გახარიამ განაცხადა, იაპონიის მხარის მიერ ავტომანქანების გადმოცემა არის პირველი ნაბიჯი ქართული პოლიციის სპეცტექნიკის ეკოლოგიურად უსაფრთხო და თანამედროვე ტრანსპორტით განახლების საქმეში, რაც მნიშვნელოვნად შეამცირებს უწყების ადმინისტრაციულ ხარჯებს.