შინაგან საქმეთა მინისტრის მოადგილემ, ნათია მეზვრიშვილმა ტრანსგენდერი ქალის ცემასთან დაკავშირებით განაცხადა, რომ შსს თანაბრად იცავს ყველა მოქალაქის უფლებას, განურჩევლად მათი სექსუალური ორიენტაციის და მრწამსისა.

მინისტრის მოადგილის თქმით, გამოძიება ძალადობის მუხლით მიმდინარეობს, თუმცა, თუ დადგინდება დისკრიმინაციული ნიშნით ძალადობა მუხლი გადაკვალიფიცირდება:

"ყველაფერს აკეთებს საგამოძიებო ორგანო იმისთვის, რომ დაადასტუროს ამ დისკრიმინაციული ნიშნის არსებობა და როგორც კი ამოვწურავთ ამ საგამოძიებო მოქმედებებს, არ არის გამორიცხული, რომ საქმე გადაკვალიფიცირდეს. დაკავებას რაც შეეხება, როგორც კი საგამოძიებო მოქმედებები ამოიწურება, ბუნებრივია, კიდევ ერთხელ ვაცხადებ, არ აქვს ჩვენთვის მნიშვნელობა, ვინ არის მსხვერპლი, ვინ არის დაზარალებული, ვიმოქმედებთ კანონის ფარგლებში და თუ საკმარისი საფუძველი იქნება, დავაკავებთ კიდეც."

მეზვრიშვილის განცხადებით მოძალადის ვინაობა დადგენილია და დანიშნულია სასამართლო- სამედიცინი ექსპერტიზა.

ტრანსგენდერი ქალი მირანდა ფაღავა აცხადებს, რომ 28 იანვარს დაახლოებით 04:00-დან 05:30 საათამდე ვაკის პარკის მიმდებარე ტერიტორიაზე მისთვის უცნობმა პირმა სცემა.

როგორც ფაღავა Facebook-ზე წერს, მარკეტში ფულის დასახურდავებლად შესვლისას უცხო პირმა დაუძახა და მასთან მისვლა სთხოვა. ფაღავას თქმით, თხოვნა დაჟინებულ მოთხოვნაში გადაიზარდა, შემდეგ კი ბრაზსა და ყვირილში. ფაღავა წერს, რომ კაცმა მიახლოებისთანავე დაარტყა, შემდეგ კი გინებისა და ტრანსფობიური შეძახილების ფონზე, მარკეტის შესასვლელში მდგარი რკინის დაფა აიღო და რამდენჯერმე ჩაარტყა.