თბილისში გამართულ ეუთოს საპარლამენტო ასამბლეაზე, საქართველოს პრემიერმინისტრი გიორგი კვირიკაშვილი წარსდგა და ორგანიზაციის 57 წევრი ქვეყნის წარმომადგენლებს სიტყვით მიმართა:

"დღეს, როდესაც, ევროპული უსაფრთხოება უპრეცედენტო გამოწვევების წინაშე დგას სტაბილურობის კუთხით, ეუთოს უმნიშვნელოვანესი როლი ენიჭება. ევროპას სჭირდება ძლიერი და ქმედითი ეუთო, რომელიც გამოწვევებს ადეკვატურად უპასუხებს".

პრემიერმა გაიხსენა სტამბოლში, ათათურქის აეროპორტში, განხორციელებული ტექრაქტი და აღნიშნა, რომ ევროპის უსაფრთხოების გადმოსახედიდან, დღევანდელი ვითარება საკმაოდ მძიმეა:

"რეგიონში განვითარებული მოვლენებით, საფრთხე ემუქრება ევროპის უსაფრთხოების პრინციპებს, ფაქტობრივად ჰელსინკის შემაჯამებელ აქტს, რომელსაც ჩვენი უსაფრთხოება ეფუძნება.

მეორე მსოფლიო ომის შემდეგ პირველად საქმე გვაქვს ევროპული სახელმწიფოს საზღვრების ძალით გამოყენებით ცვლილების მცდელობასთან და ამ დროს პარალიზებულია ეუთოს ძალისხმევა, მიიღოს გადაწყვეტილებები. იქმნება პარადოქსული ვითარება, საყოველთაო მიუღებლობის მიუხედავად, კონკრეტულ გადაწყვეტილებებს ვერ ვიღებთ".

კვირიკაშვილის თქმით, ეს ვითარება საქართველოს მდგომარეობასაც ასახავს:

"დღეს ჩვენს ქვეყანაში არსებული კონფლიქტების მიუხედავად, საქართველოში ეუთოს მისია აღარ არსებობს".

კვირიკაშვილმა დასძინა, რომ ამ ეტაპზე ევროკავშირთან ურთიერთობისას ერთ-ერთი მთავარი საკითხია სავიზო რეჟიმის ლიბერალიზაცია და საქართველოში ამის მიმართ მაღალი მოლოდინები არსებობს:

"ეს ჩვენს მოსახლეობებს ღირებულებების გაზიარებაში დაეხმარება და ამას გარდა, ქართული საზოგადოება დაინახავს, რომ ევროპასთან ინტეგრაციას ხელშესახები სარგებელი აქვს".