რესპუბლიკელები არ ენდობიან რუსთავი 2-ის დაკვეთით GfK-ს მიერ ჩატარებულ კვლევას, რომლის თანახმადაც გამოკითხულთა 30,5% ქართულ ოცნებას, 28,2% ნაციონალურ მოძარაობას, რესპუბლიკურ პარტიას კი მხოლოდ 0,6% უჭერს მხარს.

ლევან ბერძენიშვილი განმარტავს, რომ ის არასდროს ენდობა მიკერძოებული მხარის მიერ ჩატარებულ კვლევებს, შესაბამისად არც რუსთავი 2-სა და ნაციონალურ მოძრაობას, არც ქართული ოცნებას, რომელიც ატარებს კვლევას და ამბობს, რომ 90%-ს აიღებს და 100 კაცს გაიყვანს არჩევნებზე:

"მე შეიძლება ვენდო რომელიმე ობიექტურ კვლევას, რომელიც არ არის მიკერძოებული. რუსთავი 2-მა შეუკვეთა - რუსთავი 2-მა მიიღო, ტყუილების მეტი რა მოგვისმენია. ამ კვლევას მე ვუყურებ, როგორც იუმორისტულ საქმიანობას. ჩემს თავსაც ამაზე ამდენი ლაპარაკი, რომ მიწევს საკმაოდ იუმორისტულ ფერებში ვხედავ".

კვლევა პირდაპირი გამოკითხვის გზით, 2016 წლის 7 ივნისიდან 22 ივნისამდე, ჩატარდა. წინასაარჩევნო გამოკითხვაში მონაწილეობა მიიღო საქართველოს 2,200-მა სრულწლოვანმა მოქალაქემ.

კვლევა GfK-ს რუსთავი 2-მა დაუკვეთა. ტელეკომპანიის გენერალური დირექტორის ნიკა გვარამიას თქმით, აღნიშნული ორგანიზაცია "უპრეცედენტო სიზუსტითა" და "უმაღლესი სტანდარტით" გამოირჩევა.

რუსთავი 2-ის ინფორმაციით, გამოკითხულთა შერჩევა ემყარებოდა შემთხვევითობის პრინციპს და ცდომილების ზღვარი შეადგენს პლუს ან მინუს 2.1 პროცენტს. გამოკითხულთა 77 % დათანხმდა ინტერვიუზე და კითხვარის შევსებაზე.