საქართველოში ოფიციალური ვიზიტით მყოფმა უკრაინის პრემიერ-მინისტრმა ვოლოდიმირ გროისმანმა შემაჯამებელ ბრიფინგზე საქართველოსთან სექტორული თანამშრომლობის ფორმებზე ისაუბრა. დღეს, 27 ნოემბერს მთავრობის ადმინისტრაციაში საქართველოსა და უკრაინის პრემიერ-მინისტრები მედიის წარმომადგენლებს შეხვდნენ.

ბრიფინგზე უკრაინის პრემიერმა ორ ქვეყანას შორის ID ბარათებით მოგზაურობის ინიციატივა გაახმოვანა:

"ჩვენ ასევე უნდა გავამარტივოთ მოგზაურობა ჩვენს ქვეყნებს შორის, ჩვენი მოქალაქეებისთვის. ვიცით, რომ საქართველოსა და უკრაინის მოქალაქეები დაინტერესებულნი არიან ჩვენს ქვეყნებში სტუმრობით და დღეს ჩვენ გამოვთქვით დიალოგის დაწყების სურვილი ID ბარათების აღიარებასთან დაკავშირებით, რათა ჩვენი მოქალაქეებისთვის, ჩვენს ქვეყნებში მიმოსვლა უფრო მოხერხებული გახდეს".

პრემიერის თქმით, უკრაინისთვის მნიშვნელოვანი პრიორიტეტია ეკონომიკის მიმართულებით თანამშროლობა:

"დღეს უკრაინული ბიზნესი ძალიან დაინტერესებულია საქართველოს ეკონომიკური ცხოვრებით და პირიქით".

გროისმანნმა აღნიშნა, რომ საქართველო-უკრაინის თანამშრომლობის ერთ-ერთი ამოცანა იქნება სავაჭრო ბრუნვის ზრდა:

"გვაქვს საკმაოდ კარგი ტენდენცია ორმხრივი ვაჭრობის ზრდასთან დაკავშირებით, რაც ეხება საქონლით და მომსახურებით ვაჭრობას. მიმაჩნია, რომ შეიძლება გვქონდეს უფრო ამბიციური მიზანი და 500-მილიონიანი სავაჭრო ბრუნვა გავზარდოთ 1 მილიარდამდე".

უკრაინის პრემიერმა ქართულ ბიზნესთან თანამშრომლობის სურვილი გამოთქვა აგრარულ სფეროში:

"ჩვენ შეგვიძლია, გავაღრმავოთ თანამშრომლობა სხვადასხვა სექტორში - აგრარულ სფეროში, ეკონომიკის სხვადასხვა სექტორში".

უკრაინის დელეგაცია თბილისში, აბრეშუმის გზის ფორუმში მიიღებს მონაწილეობას. მისი განცხადებით, ქართველ კოლეგასთან საუბარი შეეხო ლოგისტიკის სფეროში თანამშრომლობას:

"ჩემი პროგრამის ერთ-ერთი პუნქტია „აბრეშუმის გზის ფორუმში“ მონაწილეობა, რომელიც თბილისში ხვალ გაიმართება. შევთანხმდით, დავსახოთ ერთობლივი მოქმედების მკაფიო გეგმა, რომ ავაშენოთ ერთიანი გზა ჩვენი საქონლის გადაადგილებისთვის და უზრუნველვყოთ ხარისხიანი ლოგისტიკა სხვა პარტნიორებთან ერთად იმისთვის, რომ შევთავაზოთ საუკეთესო სერვისი გადაზიდვების სფეროში ევროპიდან აზიის მიმართულებით".

გიორგი კვირიკაშვილმა აღნიშნა, რომ უკრაინა წლების განმავლობაში საქართველოს უმნიშვნელოვანესი სავაჭრო პარტნიორი იყო:

"მისასალმებელია, რომ მიმდინარე წელს სავაჭრო ბრუნვა ჩვენს ქვეყნებს შორის გაიზრდა 19%-ით და შეადგინა თითქმის ნახევარი მილიარდი დოლარი. ამასთან, უკრაინა საქართველოს ძირითად სავაჭრო პარტნიორებს შორის მე-5 პოზიციაზეა".

საქართველოში უკრაინის პრემიერ-მინისტრის ვიზიტის ფარგლებში ორ მემორანდუმს მოაწერეს ხელი, რომლებიც ეხება მიწის რეგისტრაციისა და კადასტრის სისტემის განვითარებისა და წამლების ხარისხის კონტროლის სფეროებში თანამშრომლობის განვითარებას.