მიწისძვრამ აზერბაიჯანის რაიონებში სახლების ნგრევა და დაზიანება გამოიწვია. ამის შესახებ ინფორმაციას აზერბაიჯანული მედია ავრცელებს.

თითქმის 6 მაგნიტუდის სიმძლავრის ბიძგების შედეგად, დაიბზარა კედლები, ზოგიერთი სახლი კი კრიტიკულ მდგომარეობაშია. ადგილზე შექმნილია სპეციალური კომისია, რომელიც რაიონში სახლებს ამოწმებს.

აზერბაიჯანული სააგენტო Trend-ის ცნობით, აღდამის რაიონში 130-ზე მეტი სახლი დაზიანდა.

15 ნოემბერს აზერბაიჯანის რამდენიმე რაიონში მიწისძვრა დაფიქსირდა. ბიძგები იყო ქვეყნის დასავლეთ, ჩრდილო-დასავლეთით და სამხრეთ ქალაქებში.

სეისმოლოგიური სამსახურის ცენტრის ცნობით, მიწისძვრა 15 ნოემბერს ადგილობრივი დროით 23:48 საათზე მოხდა.

მიწისქვეშა ბიძგები, რომელთა სიმძლავრე 5,7 მაგნიტუდა იყო, საქართველოს საზღვრიდან 135 კილომეტრში დაფიქსირდა. აზერბაიჯანში მომხდარი მიწისძვრა იგრძნობოდა თბილისშიც.