სამინისტროების გაერთიანების, ახალი ხელმძღვანელების დანიშვნისა და რეორგანიზაციის შემდეგ ცნობილი იქნება ზუსტი გათვლები და ბიუჯეტში შესაბამისი ცვლილებები აისახება. ამის შესახებ ფინანსთა სამინისტრომ On.ge-ს უთხრა:

"ოპტიმიზაცია გულისხმობს როგორც სტრუქტურულ, ასევე, საკადრო ოპტიმიზაციას. ცვლილებების ერთ-ერთი პოზიტიური შედეგი უდნა იყოს საბიუჯეტო თანხების ოპტიმიზაცია".

პრესსამსახურის ინფორმაციით, მოსალოდნელია, რომ სამინისტროებში შენარჩუნდება პოლიტიკის განმსაზღვრელი დეპარტამენტები და ძირითადად ადმინისტრაციული ხარჯები შემცირდება.

დღეს, 13 ნოემბერს, პრემიერ-მინისტრმა გიორგი კვირიკაშვილმა საგანგებო ბრიფინგზე ოთხი სამინისტროს გაუქმება დაადასტურა.

ეკონომიკისა და მდგრადი განვითარების სამინისტროს უერთდება ენერგეტიკის სამინისტრო და გარემოს დაცვისა და ბუნებრივი რესურსების სამინისტროს ბუნებრივი რესურსების მართვის კომპონენტი. მინისტრის თანამდებობაზე კი დიმიტრი ქუმსიშვილი ინიშნება.

განათლებისა და მეცნიერების სამინისტროს უერთდება სპორტისა და ახალგაზრდობის საქმეთა სამინისტროს ახალგაზრდობის საქმეთა მართვის კომპონენტი და მინისტრის პოსტს დაიკავებს მიხეილ ჩხენკელი, რომელიც თბილისის სახელმწიფო უნივერსიტეტის პრორექტორია. კულტურისა და ძეგლთა დაცვის სამინისტროს უერთდება სპორტისა და ახალგაზრდობის საქმეთა სამინისტროს სპორტის კომპონენტი და ამ მინისტრის თანამდებობას დაიკავებს მიხეილ გიორგაძე.

სოფლის მეურნეობის სამინისტროს გარემოს დაცვის სამინისტრო უერთდება და გაერთიანებულ სამინისტროს ლევან დავითაშვილი უხელმძღვანელებს. საგარეო საქმეთა სამინისტროს უერთდება სახელმწიფო მინისტრის აპარატი ევროპულ და ევროატლანტიკურ სტრუქტურებში ინტეგრაციის საკითხებში და მინისტრის პოსტს ვიცე-პრემიერი მიხეილ ჯანელიძე დაიკავებს.