პარტია კოალიცია ცვლილებისთვის ერთ-ერთი ლიდერი, ელენე ხოშტარია, კლინიკა "ვივამედიდან" თოდუას კლინიკაში გადაიყვანეს. ხოშტარიას მკურნალი ექიმის, ანი ქავთარაძის განმარტებით, მას თოდუას კლინიკაში დამატებითი გეგმური კვლევები ჩაუტარდა.

ქავთარაძის განცხადებით, ოპოზიციონერი პოლიტიკოსის ჯანმრთელობის მდგომარეობა სტაბილურია და მას ტკივილი შედარებით შეუმსუბუქდა.

"დღეს ჩვენ გვქონდა რუტინული, გეგმიური კვლევები, რომელიც წინასწარ იყო დაგეგმილი. თოდუას კლინიკაში ელენეს გადაყვანა გართულების გამო არ მომხდარა. როგორც იცით, ჩვენ პენიტენციურ სამსახურთან გვქონდა შეთანხმება, რომ ნაწილს კვლევების ჩავატარებდით "ვივამედში", ნაწილს — სხვა კლინიკაში, იმის მიხედვით, თუ როგორ განსაზღვრავდა მისი მკურნალი ექიმი.

ელენეს მდგომარეობა არის სტაბილური, სიმპტომურად გაუმჯობესებულია — ტკივილი, რომელიც მას ციხის პერიოდში ტანჯავდა ძირითადი ნაწილი მოხსნილია. ჩვენ შევეცადეთ ტკივილი გვემართა ადეკვატურად და დღეს გაცილებით უფრო კარგად გრძნობს ამ მხრივ თავს, თუმცა ძირითადი დიაგნოზის მკურნალობა ჯერჯერობით არ დაწყებულა, სწორედ იმიტომ, რომ ველოდებით კიდევ კვლევების დასრულებას," — განაცხადა ქავთარაძემ.

2 ივლისს ელენე ხოშტარია კლინიკა "ვივამედში" გადაიყვანეს. მისი ადვოკატის, შოთა თუთბერიძის განცხადებით, თურქი ექიმების შეფასებით, სათანადო მკურნალობის გარეშე, ელენე ხოშტარიას ჯანმრთელობას შესაძლოა, მიადგეს გამოუსწორებელი ზიანი და ვეღარ შეძლოს ეტლის გარეშე გადაადგილება.