დღეს, 25 ოქტომბერს, მეუფე დიმიტრი შიოლაშვილმა მსჯავრდებული დეკანოზი გიორგი მამალაძეს ციხეში მოინახულა. შეხვედრიდან გამოსულმა მეუფემ განმარტა, თუ რატომ არ ნახა მამალაძე აქამდე. მისი თქმით, ერთი მხრივ, გამოძიების დასრულებამდე თავი შეიკავა, რადგან მათ შეხვედრას, შესაძლოა, კითხვები მოჰყოლოდა:

"მეორე მხრივ, ემოციურად ძალიან რთულ მდგომარეობაში გახლდით, ცის ჩამოქცევა იყო ჩემთვის. ციხეში რომ მიდიხარ ადამიანი უნდა გაამხნევო. მინდა გითხრათ, რომ მეც ამას ვსაჭიროებდი იმ პერიოდში. ეს ყველაფერი იქნა დაძლეული და ღვთის ნებით შევხვდით. ძალიან ემოციური შეხვედრა გვქონდა, ძალიან მძიმე, აუცილებელი და საჭირო."

მეუფე დიმიტრის თქმით, მამალაძე ისევ ფიქრობს, რომ ეს იყო შეთქმულება მის წინააღმდეგ:

"მე ვფიქრობ, რომ ეს იყო შეთქმულება არა მხოლოდ ჩემს წინააღმდეგ, არამედ ეკლესიის წინააღმდეგ და ის, ვინც ეს დაგეგმა და ალბათ, მომავალში გაცხადდება, ვინც ეს ყველაფერი შეთხზა ეს არის ძალიან ბოროტი ადამიანი. ვერ მოიფიქრებდა ვერავინ ჩემს საკუთარ გამზრდელთან, ბიძასთან, პატრიარქთან და ა.შ. ამბოხში, წინააღმდეგობაში ჩართულობაში."

დიმიტრი შიოლაშვილის თქმით, გამოძიებამ ბევრი კითხვა დატოვა ციანიდთან დაკავშირებით. მისივე თქმით, მამალაძემ ბოდიშიც მოიხადა, რომ საქმის კურსში არ ჩააყენა:

"ჰქონდა თუ არა მას ციანიდი და მე უშუალოდ აღვნიშნე, რომ ეს ვერ დადასტურდა."

მეუფის განცხადებით, მამალაძესთან მის ბიზნეს ინტერესებზეც ისაუბრა, კომპანიებზე, რომელთა შესახებ ინფორმაცია მედიით გავრცელდა:

"მე ვუთხარი, რომ ეს უნდა მცოდნოდა, რადგან მე სასულიერო პირებს არ ვაძლევ უფლებას, რომ მსახურებასთან ერთად აწარმოონ გარკვეული ბიზნესი, რაზეც მითხრა, რომ სამწუხაროდ, არ იცოდა."

რაც შეეხება დეკანოზის ზიარების თხოვნას, შიოლაშვილის თქმით, მამალაძის მოძღვარი ბათუმშია და ალბათ, აღსარების ჩაბარების უფლებას მისცემენ.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

5 სექტემბერს დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.