"როგორც ვმუშაობთ ჩინეთთან, იმედი გვაქვს, რომ ასევე ვიმუშავებთ მომავალში ამერიკულ ადმინისტრაციასთან", — ამის შესახებ ირაკლი კობახიძემ ჩინეთთან უკვე არსებულ და აშშ-სთან სტრატეგიული პარტნიორობის აღდგენის პერსპექტივებზე საუბრისას განაცხადა. მისი თქმით, აშშ-ს წარმომადგენლებს უთხრეს, რომ აქამდე არსებული სტრატეგიული პარტნიორობა იყო "სტრატეგიული პარტნიორობა ქაღალდზე,მას არ ჰქონდა არავითარი შინაარსი" და სურთ ასეთივე [ჩინეთის მსგავსი] მიდგომით შეხედონ საქართველოსთან სტრატეგიული პარტნიორობის აღდგენას.

"იმედი მაქვს, რაზეც დღეს ვსაუბრობდი, ამას მაგალითად აიღებს ამერიკული ადმინისტრაციაც. ჩვენ ძალიან გრძელვადიანად ვისაუბრეთ, მათ შორის ბოლო შეხვედრაზე ამასთან დაკავშირებით სახელმწიფო დეპარტამენტის წარმომადგენლებთან. ჩვენ მათ ვუთხარით, რომ რაც იყო სტრატეგიული პარტნიორობა ამერიკის შეერთებულ შტატებთან ამ წლების განმავლობაში, ეს იყო სტრატეგიული პარტნიორობა ქაღალდზე. თავიდან ბოლომდე ქაღალდზე, მას არ ჰქონდა არავითარი შინაარსი. რაც შეეხება ჩინეთთან სტრატეგიულ პარტნიორობას, ამ ყოვლისმომცველ სტრატეგიულ პარტნიორობას, ეს არ არის პარტნიორობა ქაღალდზე, მას აქვს ორმხრივი შინაარსი და მას აქვს კონკრეტული შედეგები. და ჩვენ ამას ვეუბნებით ამერიკულ ადმინისტრაციას, რომ ასეთივე მიდგომით შეხედონ სტრატეგიული პარტნიორობის აღდგენას საქართველოსთან. ამ სტრატეგიულ პარტნიორობას უნდა ჰქონდეს თავისი შინაარსი, უნდა ჰქონდეს თავისი ორმხრივი სარგებელი, თავისი გზამკვლევი. როგორც ვმუშაობთ ჩინეთთან, იმედი გვაქვს, რომ ასევე ვიმუშავებთ მომავალში ამერიკულ ადმინისტრაციასთან", — თქვა კობახიძემ.

ჟურნალისტის კითხვაზე ჩინეთთან სტრატეგიული პარტნიორობის გაღრმავება, ხელს შეუშლის თუ არა ამერიკასთან სტრატეგიული პარტნიორობის დამყარებას, ირაკლი კობახიძემ განაცხადა, ხელის შეშლა არ მოხდება, რადგან საქართველო და ამერიკის შეერთებული შტატები ერთდროულად ცდილობენ გააღრმაონ ურთიერთობები ჩინეთთან

"მე მგონი, რომ როგორ შეიძლება ხელს უშლიდეს, როდესაც ჩვენ და ამერიკის შეერთებული შტატები ერთდროულად ვცდილობთ გავაღრმაოთ ურთიერთობები ჩინეთთან", — განაცხადა კობახიძემ.

მისი თქმით, საქართველოს სურს აშშ-სთან სტრატეგიული პარტნიორობა, რომელსაც ექნება კონკრეტული ორმხრივი ინტერესი,

"ფაქტია, რომ სტრატეგიული პარტნიორობა არ ყოფილა სათანადო შინაარსით დატვირთული. ჩვენ გვინდა სხვანაირი პარტნიორობა. ჩვენ გვინდა პარტნიორობა, რომელსაც ექნება კონკრეტული ორმხრივი ინტერესი, კონკრეტული ორმხრივი სარგებელი, შინაარსი და შედეგები. ჩვენ გვინდა ურთიერთობების გადატვირთვა და ამას სჭირდება ორმხრივი ნაბიჯები. ჩვენი მხრიდან ნაბიჯები გადაიდგმება, თუმცა ველოდებით შემხვედრ ნაბიჯებს ამერიკული ადმინისტრაციის მხრიდან", — განაცხადა ირაკლი კობახიძემ.