აშშ-ის სახელმწიფო დეპარტამენტმა მიიღო გადაწყვეტილება, რომლითაც დაამტკიცა უკრაინის მთავრობისთვის საზენიტო-სარაკეტო კომპლექს HAWK-ის ტექნიკური მომსახურებისა და მასთან დაკავშირებული აღჭურვილობის შესაძლო მიყიდვა. ტრანზაქციის სავარაუდო ჯამური ღირებულება 108.1 მილიონ აშშ დოლარს შეადგენს. ინფორმაციას აშშ-ის სახელმწიფო დეპარტამენტი ავრცელებს.

უკრაინის მხარემ მოითხოვა მოძრავი საანძო მისაბმელების ძირითადი მოდიფიკაციებისა და ტექნიკური მხარდაჭერის, სათადარიგო ნაწილების, სახარჯი მასალებისა და აქსესუარების შეძენა, აგრეთვე კომპონენტების შეკეთებისა და დაბრუნების უზრუნველყოფა. გარდა ამისა, ხელშეკრულება ითვალისწინებს აშშ-ის მთავრობისა და კონტრაქტორი კომპანიის საინჟინრო, ტექნიკურ და ლოგისტიკურ მომსახურებას, ისევე როგორც ლოჯისტიკისა და პროგრამული მხარდაჭერის სხვა თანმდევ ელემენტებს FrankenSAM HAWK ტიპის სარაკეტო სისტემებისთვის.

აღნიშნული გადაწყვეტილება ხელს შეუწყობს ამერიკის შეერთებული შტატების საგარეო პოლიტიკისა და ეროვნული უსაფრთხოების მიზნების განხორციელებას პარტნიორი ქვეყნის უსაფრთხოების განმტკიცების გზით, რომელიც ევროპაში პოლიტიკური და ეკონომიკური სტაბილურობის მნიშვნელოვან ძალას წარმოადგენს.

შემოთავაზებული შეიარაღება გააძლიერებს უკრაინის შესაძლებლობებს არსებული და სამომავლო საფრთხეების მოსაგერიებლად, რაც ქვეყანას თავდაცვისა და რეგიონული უსაფრთხოების მისიების უფრო ეფექტურად შესრულების საშუალებას მისცემს უფრო მძლავრი, ინტეგრირებული საჰაერო თავდაცვის სისტემის მეშვეობით. უკრაინის შეიარაღებულ ძალებს ამ ტექნიკური საშუალებებისა და სერვისების ათვისება არ გაუჭირდებათ.

აღნიშნული აღჭურვილობისა და მომსახურების მიწოდება არ შეცვლის რეგიონში არსებულ ძირითად სამხედრო ბალანსს.

პროექტის მთავარი კონტრაქტორი იქნება კომპანია Sierra Nevada Corporation. აღნიშნული გარიგება არ იქონიებს უარყოფით გავლენას აშშ-ის თავდაცვისუნარიანობასა და საბრძოლო მზადყოფნაზე.