აშშ-ის პრეზიდენტმა დონალდ ტრამპმა განაცხადა, რომ ამერიკის შეერთებული შტატები პოლონეთში დამატებით 5 000 სამხედროს გაგზავნის. ეს გადაწყვეტილება პენტაგონმა მას შემდეგ მიიღო, რაც ერთი კვირის წინ განაცხადეს, რომ პოლონეთიდან 4 000 ჯარისკაცის დაგეგმილ როტაციას გააუქმებდნენ. ინფორმაციას BBC ავრცელებს.

ტრამპმა სოციალურ ქსელში დაწერა, რომ ეს ნაბიჯი ეფუძნება აშშ-ის ურთიერთობას პოლონეთის პრეზიდენტ კაროლ ნავროცკისთან, რომელმაც გასულ წელს საპრეზიდენტო არჩევნებში მხარი მას დაუჭირა. აშშ-ის პრეზიდენტს არ დაუკონკრეტებია, დამატებითი კონტინგენტი მანამდე დაგეგმილი მისიის ნაწილია თუ სრულიად ახალი ოპერაცია.

თეთრმა სახლმა ბოლო კვირებში მიანიშნა, რომ საკუთარი პოლიტიკური კურსის — "ამერიკა უპირველეს ყოვლისას" ფარგლებში, ევროპაში სამხედროების საერთო რაოდენობის შემცირებას გეგმავს. მიმდინარე თვის დასაწყისში აშშ-მა ასევე გამოაცხადა გერმანიიდან 5 000 სამხედროს გაყვანის შესახებ, რაც მოჰყვა ტრამპსა და გერმანიის კანცლერ ფრიდრიხ მერცს შორის მომხდარ უთანხმოებას ირანთან ომთან დაკავშირებით.

ტრამპმა მანამდე გააკრიტიკა მერცი მისი განცხადების გამო, რომლის მიხედვითაც ირანელმა მომლაპარაკებლებმა აშშ "დაამცირეს". ამ დროისთვის გაურკვეველია, პოლონეთისთვის განკუთვნილი დამატებითი ძალები გერმანიიდან გამოსული კონტინგენტის ნაწილია თუ ცალკეული ჯგუფი. პრეზიდენტმა ასევე გააკრიტიკა ვაშინგტონის ნატოელი მოკავშირეები იმის გამო, რომ მათ არ ისურვეს აშშ-სთან ერთად ირანზე ზეწოლის განხორციელება ჰორმუზის სრუტის საკითხში.

NATO-ს წევრი ქვეყნების საგარეო საქმეთა მინისტრები პარასკევს შვედეთში შეიკრიბებიან სამიტზე, სადაც აშშ-ის სახელმწიფო მდივანი მარკო რუბიოც მიიღებს მონაწილეობას. მოსალოდნელია, რომ რუბიო ნატოელ პარტნიორებს ფინანსური და თავდაცვითი პასუხისმგებლობის უფრო მეტად გადანაწილებისკენ მოუწოდებს.

შეხვედრის წინ ტელეკომპანია BBC-მ მას დაუსვა კითხვა დაუდასტურებელი ინფორმაციის შესახებ, რომლის მიხედვითაც აშშ-მა შესაძლოა შეამციროს იმ ჯარისკაცების საერთო რაოდენობა, რომლებიც ხელმისაწვდომი იქნება NATO-ს წევრ ქვეყანაზე თავდასხმის შემთხვევაში. რუბიომ აღნიშნა, რომ ამ საკითხების ნაწილი სამიტზე განიხილება და დასძინა, რომ ტრამპი კვლავ უკიდურესად უკმაყოფილო და იმედგაცრუებულია ნატოელი მოკავშირეებით.

ნავროცკი დიდი ხანია ტრამპის ერთგული მხარდამჭერია და პოლონეთის საპრეზიდენტო არჩევნებში გამარჯვებამდე მისი ოფიციალური მხარდაჭერაც მოიპოვა. იანვარში BBC-ის საინფორმაციო პროგრამა Today-სთან ინტერვიუში პოლონეთის პრეზიდენტმა განაცხადა, რომ ტრამპი ერთადერთი მსოფლიო ლიდერია, რომელსაც ვლადიმირ პუტინის შეჩერება და უკრაინაში ომის დასრულება შეუძლია.

მიუხედავად NATO-ს ალიანსისა და მისი ევროპელი კოლეგების მიმართ ტრამპის ადრინდელი კრიტიკისა, ნავროცკი დარწმუნებულია, რომ აშშ კვლავ რჩება ევროპის უსაფრთხოების გარანტად. ამავდროულად, რამდენიმე რესპუბლიკელმა კანონმდებელმა მანამდე გააკრიტიკა ტრამპის გადაწყვეტილება გერმანიიდან ჯარების გაყვანის შესახებ და აღნიშნა, რომ ეს რუსეთისთვის არასწორი სიგნალის გაგზავნის რისკს შეიცავდა.

გერმანიაში ევროპაში ყველაზე დიდია აშშ-ის სამხედრო კონტინგენტია განლაგებული. ის ამჟამად 36 000-ზე მეტ მოქმედ ჯარისკაცს შეადგენს, მაშინ როცა იტალიაში დაახლოებით 12 000, ხოლო დიდ ბრიტანეთში 10 000 ამერიკელი სამხედრო იმყოფება.